Policia e Shtetit ka shprehur shqetësim për pjesëmarrjen e një numri të konsiderueshëm të miturish në protestat e ditëve të fundit, duke njoftuar se fëmijë janë gjetur në vijën e parë të përplasjeve dhe janë ekspozuar ndaj dhunës, sendeve të forta, mjeteve piroteknike dhe gazit lotsjellës. Autoritetet u bëjnë thirrje prindërve dhe kujdestarëve ligjorë të interesohen për vendndodhjen e fëmijëve të tyre dhe të mos lejojnë që ata të vendosen në rrezik për jetën dhe shëndetin.
Policia thekson se ka detyrimin ligjor për të garantuar rendin dhe sigurinë publike, me kujdes të veçantë për mbrojtjen e të miturve, por nënvizon se përgjegjësia kryesore i takon prindërve dhe kujdestarëve. Në deklaratë shprehet shqetësim i thellë për raste të dyshuara të përdorimit të fëmijëve në vijën e parë të përplasjeve për qëllime të caktuara, duke i ekspozuar ata ndaj rrezikut. Përdorimi i fëmijëve si mburojë për akte dhune përshkruhet si i papranueshëm dhe i kundërshtueshëm me të drejtën për protestë.
Policia paralajmëron se çdo rast i dyshuar i nxitjes, organizimit apo shfrytëzimit të të miturve për veprime të kundërligjshme do të dokumentohet dhe do t’u referohet institucioneve kompetente, në përputhje me ligjin. Njëkohësisht, rikujtohet se Policia respekton dhe garanton të drejtën për protesta paqësore, përfshirë të drejtat e të miturve, por do të marrë masa të nevojshme dhe proporcionale për të mbrojtur jetën dhe sigurinë e tyre.
Autoritetet u bëjnë thirrje gjithashtu pjesëmarrësve në tubime të distancohen nga personat e maskuar dhe të dhunshëm dhe të mos marrin pjesë në akte dhune e shkatërrimi. Policia kërkon ndalimin e dhunës ndaj punonjësve të saj, institucioneve dhe pronës publike e private, duke rikujtuar se çdo akt dhune rrezikon jetën dhe shëndetin e qytetarëve, veçanërisht të fëmijëve dhe të miturve. Në përfundim, theksohet se asnjë kauzë nuk duhet të rrezikojë jetën dhe sigurinë e një fëmije.
