Ministrja e Shtetit për Marrëdhëniet me Parlamentin, Erjona Ismaili, reagoi duke dënuar protestën e dhunshme në Tiranë, ku u kryen akte vandalizmi, djegie dhe dëmtime të pronës publike e private. Në reagim ajo thekson se dhuna dhe shkatërrimi nuk cenojnë demokracinë, lirinë dhe shtetin e së drejtës dhe akuzon organizatorët për nxitje të dhunës dhe për përdorimin e të rinjve në funksion të interesave politike. Ajo apelon që dhuna të mos zhvillohet “në kurriz të të rinjve dhe të Shqipërisë europiane.”
Ismaili shprehu se “Shqipëria sot nuk digjet dot se i vutë flakën mureve, as se thyet xhama, as se shkulët semaforët.” Sipas saj, “demokracia, liria, zbatimi i ligjit nuk garantohen nga mure e godina,” pasi institucionet janë ligjet, rregullat dhe fryma që ato përcjellin në përputhje me standardet europiane, të cilat nuk mund të nxihen “as nga tymi i pishave dekorative, as nga tryezat e punës të bastisura.”
Ministrja renditi dëmet e shkaktuara në biznese, institucione dhe pemë, duke akuzuar se të rinjtë u përdorën si “mish për top.” Ajo përmendi një seri investimesh dhe përmirësimesh sociale e ekonomike që, sipas saj, nuk mund të fshihen apo zhbëhen me dhunë: investime dhe rindërtime të shkollave, pagat më të mira për të rinjtë, sigurime shoqërore, rritje pensionesh, financim projektesh, mbështetje për doktoratura dhe studime shkencore, kredi studentore, shtëpi me kredi të butë dhe 0% interes, garanci për sigurinë dhe rendin, turizëm gjithëvjetor, mbështetje për fermerët dhe bizneset e vogla e të mesme, programe për studentë ekselentë dhe praktika pune. Ajo tha se këto nuk zhbëhen “as me flakë e as me dhunë.”
Reagimi gjithashtu akuzon pedagogë që, sipas ministres, kërcënojnë studentët për të dalë në shesh dhe kritikon dyfytyrësinë në reagimin ndaj policisë: kur huliganët shkatërrojnë fajësohet policia për mosgaranci, por kur policia ndërhyn quhet dhunë ndaj protestuesve. Ismaili vlerëson se prapa sulmeve të natës që synuan “djegien, shkatërrimin dhe prishjen e imazhit të Shqipërisë” qëndron e njëjta “dorë” politike, e përshkruar si “kufomë politike” që kërkon të rikthejë pushtetin. Ajo përfundon me mesazhin se pas çdo kapitulli me BE-në disa duan të hapin “një kapitull të ri dhune” në vend, por jo “mbi kurrizin e të rinjve dhe jo mbi kurrizin e Shqipërisë europiane.”
