Ministria e Shëndetësisë dhe Mirëqenies Sociale njofton se strukturat shëndetësore kanë qenë në gatishmëri të plotë gjatë protestës për t’u ardhur në ndihmë personave të dëmtuar. Sipas njoftimit zyrtar, disa protestues, përfaqësues të medias, efektivë policie dhe kalimtarë kanë marrë ndihmë mjekësore në Qendrën Spitalore Universitare “Nënë Tereza” (QSUT) dhe në Spitalin Universitar të Traumës; një pjesë e tyre vijojnë të jenë nën kujdesin e mjekëve.
Në QSUT u paraqitën tre protestues me shqetësime shëndetësore pas ekspozimit ndaj gazit. Pas konsultave mjekësore, dy prej tyre janë larguar nga spitali, ndërsa personi i tretë vazhdon ekzaminimet nga stafi i urgjencës.
Në Spitalin e Traumës u trajtuan dy përfaqësuese të medias, të cilat pas ekzaminimeve dhe konsultave janë larguar me këshillën e mjekut, në gjendje jashtë rrezikut për jetën. Gjithashtu, gjashtë efektivë të Policisë, të raportuar me dëmtime nga mjete të forta — kryesisht në gjymtyrët e sipërme dhe të poshtme — kanë marrë kujdesin e nevojshëm mjekësor dhe janë larguar nga spitali jashtë rrezikut për jetën, sipas rekomandimit të mjekëve.
Për ndihmë mjekësore janë paraqitur edhe dy kalimtarë: njëri është shtruar në spital dhe do të qëndrojë nën kujdesin e stafit mjekësor, ndërsa tjetri po mbahet në monitorim nga mjekët.
Njoftimi thekson se strukturat shëndetësore ishin të përgatitura për t’u përgjigjur çdo nevoje për ndihmë mjekësore gjatë protestës dhe pas përshkallëzimit të saj. Ministria dhe institucionet përkatëse mbeten në gatishmëri për të garantuar ofrimin në kohë të kujdesit mjekësor për çdo person që paraqet nevojë.
