Agjencia e Mbikëqyrjes Policore (AMP), nën drejtimin e Prokurorisë pranë Gjykatës së Shkallës së Parë të Juridiksionit të Përgjshëm Tiranë, ka arrestuar në flagrancë dy punonjës të Komisariatit të Policisë Nr. 4, Tiranë, të dyshuar për “Korrupsion pasiv i personave që ushtrojnë funksione publike” dhe “Shpërdorimi i detyrës”, kryer në bashkëpunim, të parashikuara nga nenet 259, 248 dhe 25 të Kodit Penal. Personat e arrestuar janë: A. S., 20 vjeç, me gradën Inspektor, me detyrë trupë shërbimi në Patrullën e Përgjithshme pranë Komisariatit Nr. 4, dhe Xh. F., 23 vjeç, me gradën Inspektor, gjithashtu me detyrë trupë shërbimi në Patrullën e Përgjithshme pranë të njëjtit komisariat, nën Drejtorinë Rajonale Tiranë.
Hetimi ka nisur pas kallëzimit të një qytetari. Nga veprimet hetimore dyshohet se punonjësit e policisë i kanë kërkuar dhe marrë një shumë prej 20.000 lekësh në këmbim të mosndëshkimit për një shkelje rrugore. Arrestimet janë kryer në flagrancë si rezultat i veprimeve hetimore të koordinuara me organin e akuzës. Hetimet vijojnë me qëllim dokumentimin e plotë të rastit dhe identifikimin e personave të tjerë që mund të jenë të përfshirë.
AMP në njoftimin e saj thekson vendosmërinë e vazhdueshme në luftën kundër korrupsionit dhe çdo shkeljeje të ligjit nga punonjësit e strukturave policore. Agjencia shprehet se do të veprojë me reagim të vendosur dhe pa kompromis ndaj çdo akti që cenon integritetin e uniformës dhe besimin e publikut te Policia e Shtetit. Veprimet e mëtejshme procedurale dhe hetimore do të kryhen sipas kompetencave ligjore për të sqaruar rrethanat e ngjarjes dhe për të dërguar materialet për veprime të mëtejshme nga ana e Prokurorisë. Burimi i njoftimit: Top Channel.
