Kryeministri Edi Rama prezantoi platformën “Pasqyra e Çmimeve” dhe nismën “KURSE”, iniciativa që synojnë lehtësimin e shpenzimeve të përditshme për familjet përmes bashkëpunimit mes qeverisë, supermarketeve dhe furnitorëve. Sipas tij, marrëveshja me pesë subjekte të rëndësishme të tregtimit të ushqimeve parashikon çmime të arsyeshme dhe të pandryshueshme për një sërë produktesh deri më 12 janar të vitit të ardhshëm, ndërsa nisma vjen në një kohë kur rritja e kostove prek konsumatorët në mbarë botën.
Rama bëri të ditur se aktualisht në iniciativa përfshihen mbi 200 artikuj, me synimin që numri të arrijë në 1,000 deri në fund të vitit. Procesi do të zgjerohet duke përfshirë edhe subjekte më të vogla dhe pika shitjeje me pakicë, për të përfshirë sa më shumë aktorë të tregut. Ai theksoi se qëllimi nuk është vendosja e çmimeve nga shteti, por nxitja e konkurrencës së lirë, transparencës dhe bashkëpunimit në mbrojtje të konsumatorëve, duke rikujtuar zgjedhjen e vendosjes së çmimeve nga konkurrenca që nga 1990.
Subjektet e përfshira do të përditësojnë çmimet në pasqyrë, kurse qytetarët do të njoftohen në kohë reale. Rama shpjegoi se iniciativa u realizua me mirëkuptim dhe dakordësi mes palëve dhe e cilësoi fillim të një procesi ku do të kërkohet mirëkuptim dhe gjithëpërfshirje. Ai përmendi se në rast se çmimet lëvizin në mënyrë të paligjshme dhe ka spekulim, ligji parashikon gjoba, sipas asaj që tha ministrja.
Kreu i qeverisë vuri në dukje se vende të ndryshme kanë marrë nisma të ngjashme dhe se kjo përpjekje nuk është përfundimtare, por një hap fillestar drejt përfshirjes më të gjerë të tregut. Ai theksoi se përvoja e programit do t’i mësojë më shumë autoritetet dhe se “Pasqyra e Çmimeve” është pjesë e një koncepti më të gjerë, “Pasqyrë Albania”, që synon rritjen e transparencës në çdo sektor, duke e bërë shtetin dhe të dhënat e tregut të aksesueshme për qytetarët me një klik. Platforma është, sipas tij, gati për t’u vënë në funksion për publikun.
