Sokol Hoxha, i ekstraduar nga Shtetet e Bashkuara dhe i dënuar me 25 vite burg për vrasjen e dy vëllezërve në Patos në vitin 1997, ka kërkuar shpalljen e parashkrimit të dënimit penal. Çështja po shqyrtohet në Gjykatën e Fierit, ku seanca e mëparshme ishte shtyrë për të kërkuar informacion nga Gjykata e Lartë lidhur me vendimmarrjen më të fundit për këtë çështje. Hoxha, 51 vjeç, është paraqitur prapë në gjykatë duke pretenduar se duhet përfituar nga parashkrimi i dënimit të dhënë në mungesë në vitin 2000.
Ai akuzohet për vrasjen e Ilirjan dhe Hektor Banaj, ngjarje e ndodhur në mars të vitit 1997 pranë tregut të fruta-perimeve në Patos. Sipas raportimeve të kohës, shkak i konfliktit që përfundoi me vrasjen dyshohet të ketë qenë një debat për një kasetofon makine. Pas ngjarjes, Hoxha u largua drejt Greqisë dhe më pas u vendos në Belgjikë.
Kërkesa për parashkrimin e dënimit vjen pas më shumë se dy dekadash nga ngjarja. Hoxha u arrestua në Shtetet e Bashkuara në maj, në kuadër të operacionit të koduar “Globi”, falë bashkëpunimit mes agjencive ligjzbatuese shqiptare, belge dhe amerikane. Më 6 gusht, ai u ekstradua në Shqipëri dhe u dërgua në burgun e Fierit për të vuajtur dënimin prej 25 vjetësh që i ishte dhënë në mungesë.
Përveç dënimit në Shqipëri, Hoxha është dënuar me burgim të përjetshëm në Belgjikë për vrasjen e Brunilda Dervishit më 29 gusht 1997 në Bruksel. Sipas hetimeve belge, viktima dyshohej se ishte shfrytëzuar për prostitucion dhe vrasja erdhi pasi ajo kishte kundërshtuar këtë shfrytëzim.
Në Gjykatën e Fierit, çështjen po e shqyrton gjyqtarja Aurora Tusha, ndërsa përfaqësuese e prokurorisë është Malbora Dinaj. Sokol Hoxha përfaqësohet nga avokatët Toto Avdija dhe Rozeta Plaku. Vendimmarrja e gjykatës për kërkesën e parashkrimit pritet të përcaktojë vijimin e procedurave lidhur me dënimin për vrasjen e dy vëllezërve në Patos.
