Ministri për Evropën dhe Punët e Jashtme, Ferit Hoxha, priti në Tiranë homologun izraelit, Gideon Sa’ar, në një takim kushtuar forcimit të marrëdhënieve dypalëshe dhe shkëmbimit mbi sfidat e sigurisë rajonale e globale, përfshirë kontributin e Shqipërisë në kuadër të Bordit të Paqes. Hoxha vlerësoi se lidhjet Shqipëri–Izrael mbahen mbi një histori miqësie, respekti dhe solidariteti, që shërbejnë si bazë për zgjerimin e bashkëpunimit në të ardhmen.
Gjatë vizitës u nënshkrua Marrëveshja për Bashkëpunimin e Përgjithshëm, e cila përbën një hap të rëndësishëm drejt forcimit të partneritetit. Marrëveshja krijon një kuadër të gjerë bashkëpunimi ndërqeveritar dhe vendos një mekanizëm të strukturuar për zhvillimin e partneriteteve konkrete në fusha me interes të ndërsjellë. Fushat e përmendura përfshijnë ekonominë dhe tregtinë, inovacionin dhe teknologjinë, bujqësinë, menaxhimin e ujërave, energjinë, shëndetësinë, arsimin, sigurinë, turizmin dhe kulturën.
Veçanërisht u theksua zhvillimi shumë pozitiv i bashkëpunimit në turizëm vitet e fundit, ku ky sektor u përshkrua si një prej më dinamikëve dhe me perspektivë brenda marrëdhënieve dypalëshe. Në aspektin e sigurisë, Hoxha rikonfirmoi qëndrimin e Shqipërisë në mbështetje të sigurisë së Izraelit, duke nënvizuar njëkohësisht rëndësinë e përpjekjeve për arritjen e një zgjidhjeje që garanton paqe, stabilitet dhe siguri afatgjatë për të gjithë rajonin.
Vizita shërbeu gjithashtu për rikthimin e angazhimit të Shqipërisë kundër terrorizmit, ekstremizmit, antisemitizmit dhe çdo forme urrejtjeje. Në këtë kontekst, ministri izraelit vizitoi një ekspozitë arkivore që dokumenton traditën e mbrojtjes së hebrenjve nga shqiptarët gjatë Luftës së Dytë Botërore, një kapitull që u përshkrua si krenari kombëtare.
Të dy ministrat vlerësuan rëndësinë e vijimit të dialogut politik dhe të bashkëpunimit në të gjitha nivelet, duke nënvizuar nevojën për koordinim të vazhdueshëm ndërmjet dy vendeve në funksion të forcimit të mëtejshëm të partneritetit Shqipëri–Izrael.
