Bashkëpunëtorë të oligarkut rus Roman Abramovich, përfshirë drejtues të Deloitte në Qipro, akuzohen për falsifikim të dokumenteve financiare për të fshehur pasuri miliarda dollarëshe dhe për të shmangur pagesën e taksave, sipas një hetimi të përbashkët të BBC Panorama dhe Byrosë së Gazetarisë Investigative. Hetimi tregon se pasqyrat financiare të miratuara nga Deloitte dyshohet se ndihmuan në largimin nga bilancet e aseteve luksoze me vlerë 672 milionë dollarë, përfshirë jahte, vila, apartamente, helikopterë dhe avionë privatë.
Një rast i identifikuar përfshin kompaninë qipriote Amiscan Investments, e cila në vitin 2003 zotëronte asete me vlerë 672 milionë dollarë. Në vitin 2006, kur ligji i ri në Qipro kërkonte publikimin e pasqyrave financiare, bashkëpunëtorët e Abramovich dyshohet se organizuan transferimin retroaktiv të aseteve te kompania mëmë e regjistruar në Ishujt Virgjër Britanikë. Deloitte Cyprus, sipas hetimit, shqyrtoi dokumentet dhe i konsideroi të mjaftueshme për të justifikuar heqjen e aseteve nga bilanci; pas pasqyrave të miratuara në 2006, në bilanc figuronin vetëm rreth 75 mijë dollarë.
Një tjetër rast lidhet me Kravin Investments, që në 2003 kishte gati 2 miliardë dollarë në llogari bankare; interesat nga këto fonde përbënin të ardhura që mund të taksoheshin në Qipro. Dokumentet tregojnë se në 2005, pas konsultimeve me Deloitte, këshilltarët diskutuan ndryshimin e pasqyrave financiare dhe të dhënave kontabël të viteve të mëparshme. MeritServus, administruesja e rrjetit të kompanive, përgatiti dokumente që paraqisnin Kravin si kompani që mbante dhe investonte para në emër të kompanisë mëmë në Ishujt Virgjër Britanikë. Korrespondenca e zbuluar tregon se Deloitte kërkoi ndryshime në bilancet bankare, të ardhurat nga interesat dhe llogaritë e fitimit e humbjes.
Hetimi përfshin edhe Electus Investments, përmes së cilës mbahej pasuri me vlerë mbi 10 miliardë dollarë; sipas dokumenteve, këshilltarët dyshohet se hartuan dokumente me data prapavepruese për të paraqitur pronësinë si në kompani me të njëjtin emër në Ishujt Virgjër Britanikë. Avokati Andrew Mitchell e përshkroi materialin si tregues të një rasti të qartë të evazionit fiskal. Deputeti qipriot Christos Christofides tha se, nëse konfirmohen shkeljet, duhet shqyrtuar rikuperimi i detyrimeve tatimore dhe përgjegjësia e të përfshirëve.
Avokatët e Abramovich kanë mohuar shmangien e taksave ose fshehjen e pasurisë në mënyrë të paligjshme, duke thënë se ai nuk kishte rol drejtues ditor dhe mbështetej në këshilla profesionale, dhe se nuk ka prova që ai të ketë ditur ose autorizuar falsifikimin. Deloitte Cyprus tha se nuk mund të komentonte mbi akuzat specifike sepse dokumentet lidhen me ngjarje më shumë se 20 vjet më parë dhe nuk janë më të disponueshme. Zbulimet bazohet në mijëra dokumente që lidhen me financat e Abramovich dhe një rrjet kompanish të administruara nga Qiproja për periudhën 1995–2022.
