Një 45-vjeçar shqiptar u arrestua në Greqi pasi, në orët e para të së dielës, duke drejtuar automjetin nën efektin e alkoolit, përfundoi brenda një taverne në zonën e Evosmosit, në Selanik, duke përplasur tavolina dhe klientë. Ngjarja ndodhi rreth orës 01:00 në një lokal që ofron ushqim dhe pije në rrugën Agamemnonos, ku klientët qëndronin në tavolinat e vendosura në ambientin e jashtëm. Automjeti hyri në zonën e jashtme, përplasi tavolina dhe disa klientë; vazo të mëdha me bimë, të vendosura përgjatë perimetrit të tavolinave, ndaluan përparimin e makinës dhe shmangën pasoja më të rënda.
Si pasojë e aksidentit u plagosën tre persona. Dy prej të plagosurve janë shkëputur nga spitali, ndërsa një burrë vazhdon të marrë trajtim mjekësor dhe, sipas mediave greke, nuk ndodhet në rrezik për jetën. Pas arrestimit, drejtuesit të automjetit iu nënshtrua testit të alkoolit, i cili konfirmoi se ai ishte nën efektin e alkoolit.
Mediat greke raportojnë se ndaj 45-vjeçarit janë ngritur akuza për drejtim të rrezikshëm të automjetit, shkaktim të dëmtimeve trupore nga pakujdesia ndaj disa personave dhe drejtim të automjetit nën efektin e alkoolit. Ai është dërguar për gjykim në Gjykatën Penale me Procedurë të Përshpejtuar dhe vijon të mbahet në paraburgim pas arrestimit.
Pronarja e lokalit tha se prania e vazove të mëdha me bimë mund të ketë shmangur një tragjedi: “Nëse nuk do t’i kishim vazot, do të kishim funerale”. Ajo tha se ishte larguar pak minuta para aksidentit dhe u kthye menjëherë pasi u njoftua, duke përshkruar situatën si tmerr dhe panik. Një kliente që ka bashkëshortin në spital tha se pas përplasjes drejtuesi i automjetit tentoi të largohej, por klientët ndërhynë për ta ndaluar, duke përdorur edhe karrige. Një tjetër dëshmitare, e cila mbeti e plagosur, tha se ndihet me fat që ka shpëtuar dhe konfirmoi se vazot ndihmuan në parandalimin e pasojave më të rënda.
