Një seri sulmesh të dhunshme në shkollat e Polonisë ka shkaktuar alarm dhe ka detyruar autoritetet të ndërmarrin masa të jashtëzakonshme sigurie, për shkak të frikës se incidentet mund të nxisin ngjarje të tjera. Incidenti më i rëndë ndodhi të enjten në shkollën fillore në Leszczydół-Noëiny, në verilindje të Varshavës, ku një 15-vjeçar goditi për vdekje me thikë në qafë një punonjëse 37-vjeçare të shkollës, nënë e dy fëmijëve. Drejtori dhe një mësuese që ndërhynë e ndaluan agresorin, por mbetën të plagosur; adoleshenti, ish-nxënës i shkollës, u arrestua në vendngjarje. Ai mbante një helmetë me kamerë, me të cilën dyshohet se kishte planifikuar të filmonte sulmin, dhe kishte tre thika me vete.
Një ditë më parë, në Ostrołęka, një 19-vjeçar plagosi nëntë persona — nxënës, mësues dhe kalimtarë — gjatë një sulmi me mjet të mprehtë në një shkollë profesionale; në çantën e tij u gjet edhe një bombë artizanale që nuk shpërtheu. Po atë ditë, në Sierpc u arrestua një 17-vjeçar i dyshuar se po përgatiste një sulm në shkollën e tij. Kryeministri Donald Tusk i përshkroi ngjarjet si një sinjal serioz paralajmërues dhe urdhëroi shtimin e pranisë policore dhe patrullimeve të përditshme edhe brenda institucioneve arsimore.
Autoritetet po hetojnë nëse sulmet lidhen me sfida të dhunshme në rrjetet sociale, por deri tani nuk ka prova për një lidhje të drejtpërdrejtë mes incidenteve. Frikën e ushqyen mesazhet në internet për një të ashtuquajtur “të premte të përgjakshme”, që çuan në mbylljen e disa shkollave. Ministri i Digjitalizimit, Krzysztof Gawkowski, tha se pretendimet për një sfidë të organizuar në nivel kombëtar janë dezinformim.
Policia ka kontrolluar rreth 10 mijë shkolla dhe institucione arsimore, ndërsa dhjetë persona, përfshirë tre të mitur, janë arrestuar lidhur me kërcënimet e shpërndara online. Ngjarjet kanë rilëshuar debatin mbi radikalizimin e të rinjve përmes platformave digjitale. Parlamenti miratoi një ligj që lejon heqjen më të shpejtë të përmbajtjeve kriminale nga interneti, por hyrja e tij në fuqi varet nga presidenti Karol Nawrocki, i cili kishte vendosur veton ndaj një nisme të ngjashme në janar. Sulmet kanë tronditur Poloninë, ku dhuna e këtij lloji në shkolla ishte deri tani relativisht e rrallë, duke ngritur shqetësime për sigurinë e nxënësve dhe ndikimin e përmbajtjeve të dhunshme online.
