Presidenti i Shteteve të Bashkuara, Donald Trump, i deklaroi agjencisë Bloomberg se “Ukraina duhet të zhvillojë zgjedhje” dhe se homologu i tij rus, Vladimir Putin, dëshiron të arrijë një marrëveshje për t’i dhënë fund luftës. Trump kritikoi gjithashtu presidentin ukrainas, Volodymyr Zelensky, duke thënë se “Lufta mund të ishte zgjidhur shumë herë, por Zelensky nuk ka dashur të bëjë një marrëveshje. Nëse do të kishte arritur një marrëveshje dy vjet më parë, do të kishte qenë më mirë për të dhe mund të kishte siguruar kushte më të favorshme. Vladimir Putin dëshiron shumë të arrijë një marrëveshje.”
Në të njëjtën linjë me kritikat ndaj udhëheqjes ukrainase është rreshtuar edhe miliarderi Elon Musk, pronar i SpaceX dhe Tesla, i cili tha se Zelensky “ka shkuar shumë larg”. Deklaratat vijnë ndërsa debati për mundësinë e negociatave për përfundimin e konfliktit mbetet pjesë e diskutimeve ndërkombëtare, ndërsa luftimet vijojnë në terren.
Sulmet e fundit kanë shkaktuar viktima dhe dëmtime të shumta në popullsinë civile. Një fëmijë 11-vjeçar humbi jetën dhe pesë persona të tjerë, përfshirë dy fëmijë, u plagosën gjatë sulmeve ruse me dronë dhe raketa në rajonin e Dnipropetrovskut, mbrëmjen e së shtunës. Autoritetet rajonale njoftuan se sulmi goditi zonën e Pokrovskes në distriktin e Nikopolit. Mes të plagosurve janë një vajzë 10-vjeçare dhe një djalë 12-vjeçar, të dërguar në spital së bashku me tre të rritur: një burrë 47-vjeçar dhe dy gra, përkatësisht 49 dhe 61 vjeçe.
Guvernatori rajonal, Oleksandr Hanzha, tha se forcat ruse sulmuan rajonin më shumë se 30 herë gjatë ditës së shtunë, duke përdorur dronë dhe artileri. Në distriktin e Nikopolit, sulmet dëmtuan ndërtesa banimi, një pikë karburanti dhe një ambulancë. Goditje u regjistruan edhe në komunitetin e Zelenodolskut, në distriktin e Kryvyi Rihut, ku u dëmtuan banesa private dhe infrastrukturë, ndërsa në komunitetin e Mykolaivit, në distriktin e Dnipros, raportohet dëme në automjete dhe makineri bujqësore.
Ndërsa në planin diplomatik shtohen deklaratat për mundësinë e një marrëveshjeje, ngjarjet në terren tregojnë vazhdimin e pasojave të rënda për civilët në Ukrainë.
