Marrëveshja për naftën midis Donald Trump dhe Vladimir Putin ka prishur marrëdhënien ndërmjet presidentit amerikan dhe homologut të Ukrainës, Volodymyr Zelensky. Pas kritikave të Zelenskyt, Trump deklaroi se “është koha që Ukraina të ketë një president të ri”. Presidenti ukrainas paralajmëroi se një marrëveshje e re për të liruar miliona tonë naftë ruse në SHBA dhe tregjet botërore do t’i siguronte Moskës para për të vazhduar luftën në Ukrainë, duke e cilësuar atë si një dhuratë të Trump për Putinin.
Duke u larguar nga Shtëpia e Bardhë, Trump u shpreh se Zelensky “dëshiron t’i krijojë probleme botës” duke vazhduar autorizimin e sulmeve ndaj rafinerive ruse dhe shtoi se “Më mirë të ndalet”. Ai sugjeroi gjithashtu se Ukraina duhet “të ketë një udhëheqës të ri, që mund të bëjë një marrëveshje” dhe komentoi se “Ai mund të kishte bërë shumë marrëveshje dhe për ndonjë arsye, nuk i bën kurrë”.
Presidenti amerikan konfirmoi të premten se ishte arritur një marrëveshje me Moskën për të pezulluar sanksionet mbi eksportet ruse të naftës deri më 7 prill. Lajmi për marrëveshjen u bë shkak për ndërprerjen e një takimi në Miami mes delegacionit të Zelenskyt dhe përfaqësuesve të Trump, i cili ishte planifikuar për të diskutuar mënyra për të bindur Rusinë që t’i jepte fund luftës. Takimi u ndërpre sapo ekipi ukrainas mori njoftimin për marrëveshjen.
Gjatë bisedimeve në Miami, Witkoff dhe Kushner i paralajmëruan përfaqësuesit e Kievit se nëse vendos të vazhdojë bombardimin e rafinerive ruse, inteligjenca amerikane do të ndalojë ndarjen e informacionit me inteligjencën ukrainase. Megjithatë, pas njoftimit për marrëveshjen Trump-Putin, një zyrtar ukrainas deklaroi se “sulmet do të vazhdojnë”. Si pasojë, ekipi ukrainas vendosi të kthehej në shtëpi dhe të anulonte raundin e dytë të bisedimeve të planifikuara me Shtetet e Bashkuara për të shtunën, 10 tetor.
