Presidenti amerikan Donald Trump njoftoi një marrëveshje me presidentin rus Vladimir Putin për furnizim të menjëhershëm dhe gradual me miliona ton naftë në tregjet amerikane dhe globale, pas një bisede telefonike mes tyre. Në një postim në Truth Social, ai e përshkroi bisedën si “jashtëzakonisht të suksesshme” dhe tha se marrëveshja, së bashku me, siç pretendoi ai, kontrollin që SHBA ushtrojnë në Ngushticën e Hormuzit, do të çojë në një ulje të shpejtë të çmimeve të naftës për amerikanët dhe në nivel ndërkombëtar.
Sipas njoftimit të Trump, Rusia ka rënë dakord të vërë menjëherë në dispozicion më shumë se 300,000 ton naftë për tregjet amerikane dhe globale, ndërsa 500,000 ton shtesë janë planifikuar për dorëzim në nëntor. Ai tha se një sasi e re prej 1,000,000 ton do të pasojë, pa specifikuar kohën, dhe se Moska është e angazhuar të dorëzojë 3,000,000 ton të tjerë në një afat të shkurtër, varësisht nga gjendja e rafinerive ruse. Nëse këto sasitë zbatohen plotësisht, dërgesat do të arrijnë rreth 4.8 milionë ton naftë në total.
Trump lidh njoftimin me përpjekjet për të ulur kostot e energjisë, duke theksuar veçanërisht ndikimin e çmimeve të larta të naftës mbi sektorët bujqësor dhe të transportit. “Falë KONTROLLIT tonë TOTAL të Ngushticës së Hormuzit dhe këtij njoftimi të shkëlqyer mbi energjinë ruse, çmimet e naftës për amerikanët dhe në fakt për të gjithë botën do të ULEN, NË NIVELE REKORD, DHE SHPEJT!”, shkroi ai. Ai shtoi se sigurimi i çmimeve më të ulëta është një përparësi kryesore e administratës së tij për fermerët, blegtorët dhe shoferët e kamionëve.
Trump përfundoi njoftimin me një deklaratë mbi programin bërthamor të Iranit: “Për më tepër, duhet të kuptohet se Irani nuk do të ketë një armë bërthamore!”, duke përsëritur qëndrimin se Uashingtoni nuk do të lejojë që Teherani të fitojë një arsenal bërthamor.
Njoftimi vjen ndërsa tregu i karburantit në SHBA është nën presion; sipas Reuters, çmimet e naftës në SHBA janë rritur rreth 70% që nga fillimi i konfliktit me Iranin, duke arritur 6.28 dollarë për galon. Qeveria amerikane po kërkon mënyra për të ulur kostot me më pak se katër javë deri te zgjedhjet e mesit të mandatit më 3 nëntor.
