Tre shtetas shqiptarë janë arrestuar në Janinë pasi policia greke gjeti dhe sekuestroi 36 kg e 250 gramë marijuanë, njoftojnë autoritetet. Ngjarja u zhvillua pas ndjekjes së një automjeti që vinte nga Filati, në kufirin e gjelbër midis Sarandës dhe Igumenicës.
Në kuadër të operacionit për luftimin e importimit të lëndëve narkotike dhe pas përdorimit të informacionit të marrë, oficerët e Departamentit të Narkotikëve të Nëndrejtorsë të Ndjekjes dhe Hetimit të Krimit të Janinës, në bashkëpunim me Departamentin e 2-të të Rojës Kufitare të Filatit, Thesproti, lokalizuan dy mjete që lëviznin njëri pas tjetrit. Në automjetin e parë udhëtonin dy shtetas shqiptarë, ndërsa në automjetin e dytë ishte një tjetër shtetas shqiptar.
Të dy mjetet u ndaluan dhe gjatë kontrollit në automjetin e dytë u gjetën dhe u sekuestruan 34 pako me marijuanë, me një peshë totale prej 36 kg e 250 gramë. Sipas informacioneve të policisë, dy personat në automjetin e parë po vepronin si eskortë për automjetin e ngarkuar me drogë.
Si pjesë e hetimeve, autoritetet sekuestruan dy automjete, një shumë parash në vlerë 2,935 euro dhe 40,480 lekë të reja, si dhe tre telefona celularë. Kundër të arrestuarve është ngritur një çështje penale për trafik droge nga Departamenti Kundër Drogës në Prokurorinë Publike të Janinës.
Personat e arrestuar priten të dërgohen në Prokurorinë e Shkallës së Parë të Janinës për ndjekje të mëtejshme ligjore. Lajmi raportohet nga Top Channel.
