Kryeministri Edi Rama vuri në dukje se një nga problemet më serioze të administratës publike është mungesa e lidhjes së avancimit në karrierë me performancën në punë. Gjatë prezantimit të reformës “Shkalla e Meritës”, e cila synon ndërtimin e një administrate profesionale dhe të përgjegjshme, Rama theksoi se shumica dërrmuese e nëpunësve civilë mendojnë se puna ose mosangazhimi nuk ndikojnë në vlerësimin dhe rritjen profesionale, dhe se nuk ka pasoja negative për ata që nuk punojnë.
Kryeministri pranoi se vetë ka qenë skeptik për mundësitë reale të përmirësimit të cilësisë së administratës, veçanërisht në kuadër të përgatitjeve për hapjen e negociatave me Bashkimin Europian, duke përmendur periudhën që e përshkroi si “tunelin e poshtërimit”. Ai tha se një shqetësim i thellë i qytetarëve lidhet me meritokracinë dhe mënyrën e përzgjedhjes së personave që punojnë në administratë, dhe se protestat e qytetarëve janë shprehje e pakënaqësive të akumuluara dhe kërkese për përshpejtimin e reformave.
Rama theksoi se meritokracia duhet të jetë kriter vendimtar për hyrjen në punë në administratën publike, dhe se ky argument ishte i përsëritur gjatë dëgjimeve në zyrat shtetërore. Si pjesë të transformimit administrativ, ai prezantoi “Shkallën e Meritës” si komponent shtesë, në vijim të nismave si BESA dhe platforma “Pasqyra”. Sipas tij, procesi është transformues dhe i thellë, ndonëse jo shumë i bujshëm; “Pasqyra” do të bashkojë elementët e shtetit në një vend të vetëm.
Reforma mbështetet në një anketë të brendshme anonime, ku një numër i madh nëpunësish civilë kanë shprehur opinionet e tyre për gjendjen dhe përmirësimin e administratës. Procesi i vlerësimit do të nisë nga drejtuesit e lartë, veçanërisht sekretarët e përgjithshëm të ministrive, pasi përgjegjësia e tyre ndikon drejtpërdrejt në funksionimin e sistemit; nëse ata dështojnë, sipas Ramës, çedon i gjithë sistemi. Ai gjithashtu përmendi mekanizmin e testimeve periodike që u jep mundësi nëpunësve të rrisin pikët dhe të ngjiten në shkallë më të lartë, duke theksuar nevojën për të adresuar rastet ku pjesëmarrësit e programeve të ekselencës mbeten jashtë sistemit pas përfundimit të periudhës së punës, edhe pse kanë pasur performancë të mirë.
