Deputeti i Partisë Socialiste, Erion Braçe, në fjalën e tij në foltoren e Kuvendit foli për lidhjen personale me qytetarët që e kanë votuar dhe për qëndrimin kundër reformës territoriale, të cilën e shprehu edhe në mbledhjen e grupit parlamentar të PS. Ai kujtoi zgjedhjen e tij të parë si deputet në Poliçan dhe marrëdhënien me banorët e kësaj zone, duke theksuar se gjatë viteve është përfaqësuar nga besimi i qytetarëve të Poliçanit, Beratit, Kuçovës dhe më pas Kavajës, ndërsa shprehu mirënjohje për mbështetjen që thotë se ka marrë në bashkëjetesën me këto komunitete.
Duke folur për reformën territoriale, Braçe vuri në dukje se me pushtetin vendor janë bërë “eksperimente pas eksperimesh” dhe se ka kaluar kohë që praktikat e mëparshme nuk kanë sjellë zgjidhje të qëndrueshme. Ai theksoi se pushteti vendor është pushteti i qytetarit dhe se ligji për reformën aktualisht vizaton një hartë të re që, sipas tij, është provuar e përkohshme dhe e pamjaftueshme si reformë. Braçe kujtoi se edhe në vitin 2014 harta u përdor si mundësi politike për krijimin e votave dhe vuri në dukje se edhe e reja pritet të ndryshojë, ndërsa do të marrë fuqi zbatimi në vitin 2031.
Deputeti argumentoi se qëndrueshmëria e reformave nuk sigurohet nga votat, por nga parimet, të cilat sipas tij janë shkelur dhe nuk janë zbatuar njësoj në gjithë territorin e përcaktuar nga harta. Ai insistoi se reforma duhet të ketë në qendër qytetarin dhe jo vetëm ndryshimin e kufijve administrativë, duke shtuar se ndryshimet në hartë ndikojnë në jetën e njerëzve dhe plane të tyre personale.
Braçe u ndal edhe te kompetencat e bashkive, duke thënë se shumë prej tyre janë transferuar pa buxhet ose me buxhet të pamjaftueshëm. Ai përmendi se aktualisht në bashki janë 46 kompetenca, dhe kritikoi mënyrën se si janë përcaktuar dhe administruar këto kompetenca në procesin e reformës. Ndër të tjera, ai kërkoi që kriteret dhe vendimmarrja të jenë të qarta dhe në shërbim të qytetarëve.
