Moti i keq ka përfshirë disa zona të Italisë, me reshje të dendura dhe stuhi që kanë shkaktuar përmbytje, rrëzime pemësh dhe dëme materiale. Në Toskanë është shpallur alarm portokalli, ndërsa alarmi i verdhë është në fuqi në Abruzzo, Basilicata, Campania, Friuli-Venezia Giulia, Lazio, Liguria, Lombardia, Marche, Molise, Puglia dhe Umbria.
Pas reshjeve të forta, disa bashki në Toskanë kanë vendosur mbylljen e parqeve, kopshteve dhe varrezave, si dhe janë pezulluar zhvillimet e mësimit në disa zona. Shkollat janë mbyllur në Livorno, Pistoia dhe në disa qytete të tjera të provincave. Masa të ngjashme janë marrë edhe në Carrara, ku është ndaluar edhe hyrja në plazhe. Mbyllje institucioni dhe hapësirash publike janë vendosur edhe në disa bashki të Lunigiana, në Grosseto dhe në zona të ndryshme të Maremës.
Në Lucca, kryebashkiaku ka urdhëruar mbylljen e mureve historike të qytetit. Në Viareggio, një pjesë e bulevardit Viale dei Tigli është bërë e pakalueshme; gjatë natës një stuhi ka dëmtuar rëndë çatinë e një kopshti fëmijësh dhe ka shkaktuar dëme në disa banesa. Në Firence janë mbyllur parqet, kopshtet dhe varrezat, ndërsa në Prato janë marrë masa për kopshtet, impiantet sportive, pistat e biçikletave dhe varrezat.
Edhe Roma dhe rrethi i saj janë goditur nga një stuhi e fuqishme gjatë natës. Sipas të dhënave të zjarrfikësve janë kryer rreth 120 ndërhyrje, kryesisht për pemë dhe degë të rrëzuara, shtylla të rrjetit telefonik të dëmtuara dhe infiltrime uji në banesa. Salla operative e komandës së zjarrfikësve vazhdon të marrë kërkesa të shumta nga qytetarët, ndërsa ekipet e emergjencës po punojnë për ndërhyrjet dhe sigurimin e zonave të prekura.
Autoritetet vijojnë të monitorojnë situatën ndërkohë që reshjet dhe kushtet e paqëndrueshme atmosferike pritet të vazhdojnë të ndikojnë në disa rajone të Italisë.
