Emisioni investigativ Fiks Fare publikoi dëshmi me zë dhe figurë të Zaim Krasniqit (alias Dhimitër Kashnica), babait të Mirzeta Kashnicës, punonjese në Ministrinë e Infrastrukturës dhe Energjisë, e cila është marrë e pandehur në të njëjtën dosje me ish-zv/kryeministren Belinda Balluku. Babai rrëfen presionet e shumëfishta ndaj së bijës, kërcënimet me jetë dhe vetëvrasjen e bashkëshortit të saj, si dhe vështirësitë që familja ka përjetuar pas përfshirjes së Mirzetës në hetimin e SPAK.
Çështja lidhet me tenderin për tunelin e Llogorasë, pjesë e aksit Orikum–Himarë në autostradën Vlorë–Sarandë. Tenderi i parë u hap më 11 dhjetor 2020 me fond limit rreth 19.1 miliardë lekësh; morën pjesë 6 operatorë, por procedura u anulua në prill 2021 pasi asnjë ofertë nuk u cilësua si në përputhje me dokumentet. Në këtë fazë ishte oferta e “Gjoka Konstruksion” rreth 140 milionë euro. Më 22 qershor 2021 tenderi u rihap me fond limit rreth 18.9 miliardë lekë pa TVSH; konkuruan 5 ofertues dhe fitues u shpall bashkimi i kompanive turke “Intekar” dhe “ASL” me ofertë rreth 170 milionë euro pa TVSH. Kjo procedurë është aktualisht objekt hetimi në SPAK.
Sipas SPAK, Balluku si ministre ka ndjekur dhe orientuar procedurën nga faza përgatitore deri te lidhja e kontratës. Pesë anëtarët e Komisionit të Vlerësimit të Ofertave — Evis Berberi, Gentian Gjyli, Erald Elezi, Jetmira Dervishi dhe Mirzeta Kashnica — janë marrë të pandehur për “shkelje të barazisë së pjesëmarrësve në tendera apo ankande publike” në bashkëpunim. SPAK pretendon se fituesi ishte paracaktuar dhe i ishin krijuar avantazhe të padrejta.
Në dëshminë e saj për SPAK, Mirzeta ka deklaruar se në procedurën e parë vlerësonte se “Gjoka Konstruksion” përmbushte kriteret dhe duhej shpallur fituese, dhe më pas është vënë nën presion për ndryshimin e qëndrimit dhe firmosjen e dokumenteve. Babai i saj në bisedën me gazetarët thotë se Mirzeta nuk ka pranuar dhurata, nuk ka firmosur disa vendime pasi ishte shtatzënë, dhe se pas bashkëpunimit me SPAK ka marrë përsëri presione; po ashtu shpjegon se vajza shkoi te SPAK pa avokat për të denoncuar presionet. Mirzeta vazhdon të punojë, por sipas babait, presionet kundrejt saj dhe familjes vijojnë.
