Behgjet Pacolli reagoi në rrjetet sociale lidhur me zhvillimet rreth Aeroportit Ndërkombëtar të Vlorës, duke deklaruar se ai dhe kompania MABCO arritën një fitore pas vendimit të Gjykatës së Apelit të Tiranës, të cilin sipas tij e rrëzon një vendim të mëparshëm që kishte sjellë bllokimin e hyrjes në terminal dhe pengimin e vijimit të punimeve. Pacolli thotë se çështja ka kaluar në arbitrazh ndërkombëtar dhe po shkakton kosto të larta ligjore dhe dëme të tjera për kompaninë.
Në reagimin e tij, ai përmend vendime të mëparshme të Gjykatës së Lartë dhe apelimit dhe kërkon që përgjegjësit për veprime që i konsideron kundërligjshme të përballen me përgjegjësi. Pacolli thekson se qëllimi i MABCO-s mbetet përfundimi i punimeve dhe vënia në operim e aeroportit, ndërsa shpreh shqetësim për masat e vendosura nga arbitri emergjent ndërkombëtar, të cilat sipas tij vendosin status quo-në, kufizojnë veprime të caktuara dhe krijojnë pasiguri për projektin.
Mediat në Kosovë raportojnë se ish-ortaku i Pacollit në projekt, biznesmeni Valon Lluka, është paraqitur në Policinë e Kosovës, tek Drejtoria për Hetimin e Krimeve Ekonomike dhe Korrupsionit. Pacolli në postimin e tij shkruan se MABCO po përballon dëmet dhe kostot për të mbrojtur të drejtat dhe investimin, dhe përsërit synimin për t’u përqendruar në përfundimin e veprës “me rëndësi kombëtare”, duke kërkuar që organet e drejtësisë të sjellin para përgjegjësisë ata që vepruan kundërligjshëm.
Në sfond të këtyre zhvillimeve, Ministria e Infrastrukturës dhe Energjisë në Shqipëri nisi më parë procedurat për zgjidhjen e kontratës koncesionare të Aeroportit të Vlorës, me arsyetimin se nuk ishin respektuar afatet për përfundimin e punimeve. Vendimi u mor pas mosmarrëveshjeve mes dy kompanive aksionere, MABCO Constructions dhe 2A Group, të cilat sjellën bllokimin e punimeve. Çështja më pas kaloi në arbitrazh ndërkombëtar.
