Një nga surprizat më të mëdha në serinë e koncerteve të Shakirës në Madrid ishte shfaqja e papritur e Dua Lipës në skenë, ku të dyja këngëtaret performuan së bashku hitin e Shakirës “Antología”. Momenti u regjistrua të shtunën, më 3 tetor, gjatë një prej 12 koncertesh që artistja po zhvillon në kryeqytetin spanjoll si pjesë e turneut botëror “Las Mujeres Ya No Lloran”.
Para bashkëperformancës, Shakira e prezantoi Dua Lipën me fjalë të ngrohta, duke shprehur admirimin për të: “Është një nder dhe privilegj për mua të këndoj këtë këngë, e cila do të thotë kaq shumë për mua, me këtë grua që admirohet dhe dashurohet në të gjithë botën”, tha Shakira, dhe shtoi: “Sot, zyrtarisht e shpall veten fanse tënden”. Më pas, të dyja interpretuan “Antología”, këngë nga albumi i Shakirës i vitit 1995, “Pies Descalzos”. Shakira u shfaq në skenë me një kostum të kuq, ndërsa Dua Lipa veshi një fustan të zi, të tejdukshëm dhe vezullues.
Pas përfundimit të performancës, dy yjet u përqafuan në skenë, ndërsa Shakira, e emocionuar, deklaroi: “Zoti im, Zoti im, kjo mungonte në këtë turne”. Për Dua Lipën ky bashkëngjitje ishte veçanërisht domethënëse, pasi ajo kishte interpretuar më parë “Antología” në spanjisht në nëntor 2025 gjatë koncertit të saj në Bogota, si pjesë e “Radical Optimism Tour”. Këtë herë ajo pati mundësinë ta këndonte këngën së bashku me krijuesen e saj.
Pas koncertit, Dua Lipa ndau në rrjetet sociale fotografi nga skena me Shakirën dhe shkroi se ishte “një natë në Madrid me Shakirën” dhe shprehu mirënjohjen për ftesën dhe përvojën për të ndjerë një lidhje me publikun. Edhe Shakira publikoi fotografi dhe përshkroi takimin si “një ëndërr të bërë realitet për shumë prej nesh”.
Shakira po zhvillon një seri prej 12 koncertesh në Madrid, të nisura më 18 shtator dhe që do të përfundojnë më 11 tetor, me një skenë të përkohshme në Iberdrola Music dhe rreth 55 mijë spektatorë çdo natë. Gjatë këtyre shfaqjeve ajo ka ftuar në skenë edhe artistë të tjerë, ndërsa paraqitja e Dua Lipës u përshkrua nga mediat si një nga surprizat më të veçanta të turneut.
