Hirata Runa, vetëm 8 vjeçe dhe anëtare e grupit japonez Dianna Project, ka ndërruar jetë papritur në fund të shtatorit, vetëm pesë ditë pas një performancë përpara mijëra fansave. Sipas njoftimit të familjes dhe agjencisë së saj, shkaku i vdekjes ishte miokarditi fulminant, një inflamacion i rëndë i muskulit të zemrës, që grupi deklaroi se ishte shkaktuar nga një virus.
Në deklaratën e publikuar nga Dianna Project thuhej: “Me keqardhje ju njoftojmë se Hirata Runa ka ndërruar jetë për shkak të miokarditit që është shkaktuar nga një virus”. Agjencia shprehu mirënjohje për fansat që e mbështetën Runën gjatë karrierës së saj dhe kërkoi respekt për familjen në këtë periudhë të vështirë. Në të njëjtën deklaratë u kërkua nga fansat të shmangnin pyetjet apo kërkesat për intervista lidhur me vdekjen e saj.
Runa kishte lindur në Nagoya, Japonia, dhe ishte bërë pjesë e Dianna Project që në moshë shumë të vogël. Grupi i përket skenës japoneze të “idolëve”, ku artistët ndërtojnë një marrëdhënie të veçantë me fansat përmes muzikës dhe performancave. Performanca e fundit e Runës u zhvillua vetëm pesë ditë para vdekjes; pas koncertit ajo kishte publikuar një mesazh për fansat: “Faleminderit edhe për sot, e vlerësova shumë. Ishte vërtet argëtuese.” Pak ditë më vonë, ajo humbi jetën pas komplikimeve të shkaktuara nga miokarditi.
Familja e Runës e kujtoi me një mesazh prekës dhe kërkoi që ajo të mbahet mend si një artiste e përjetshme. Në mesazhin e familjes shkruhej: “Runa kaloi një të tretën e jetës së saj si idhull. Ju lutemi lëreni në një cep të zemrave tuaja si një idhull të përjetshëm”. Agjencia gjithashtu shprehu mirënjohjen më të thellë për të gjithë ata që ofruan ndihmë dhe për fansat që e mbështetën Runën gjatë kohës së saj si artiste.
