Aktori francez Olivier Martinez ka akuzuar ish-bashkëshorten Halle Berry se ka ushtruar dhunë fizike ndaj djalit të tyre 12-vjeçar, Maceo, gjatë një konflikti. Sipas dokumenteve gjyqësore, të cituara nga “People”, Martinez pretendon se më 26 shtator Berry është përplasur me djalin dhe ia ka vendosur duart rreth qafës, duke u përpjekur ta mbyste. Ai e ka përshkruar këtë si incidentin “më të fundit” në një seri të pretenduar rastesh dhune, dhe në dokumente thotë se “kanë ndodhur edhe incidente të tjera abuzimi gjatë viteve të fundit”.
Martinez ka paraqitur në gjykatë një kërkesë për masa të përkohshme mbrojtëse, duke kërkuar ndërhyrjen e gjykatës lidhur me situatën. Në kërkesë janë bashkëngjitur edhe mesazhe ndërmjet ish-çiftit, ku ata diskutojnë me tone të tensionuara se me cilin prind do të qëndronte djali në ditët përkatëse. Në një nga mesazhet, Berry shprehet se është nëna e Maceos dhe ndihet e shpërfillur: “Jam nëna e tij! Ai nuk më respekton aspak dhe as ti, si babai i tij, nuk duhet ta pranosh këtë. Nuk më respekton, ndihem sikur nuk kam zë në asgjë. Jam thjesht një portofol! Kjo nuk është e drejtë!”, thuhet në mesazh. Të nesërmen, më 27 shtator, Berry i ka dërguar Martinez një tjetër mesazh, duke kërkuar që ai ta inkurajonte djalin të fliste me të: “Do ta vlerësoja vërtet nëse do ta inkurajoje të fliste me mua sot. Ndihem tmerrësisht keq për atë që ndodhi mbrëmë dhe e di që edhe ai ndihet kështu”.
Avokatja e Halle Berry, Marina Beck, ka cilësuar pretendimet e Martinez si “krejtësisht të pabazuara dhe qëllimisht mashtruese”. Ajo ka deklaruar se Berry, megjithëse është “thellësisht e trishtuar” nga situata, nuk do të lejojë që akuzat ta pengojnë të mbrojë atë që ajo e konsideron si interesin më të mirë të djalit të tyre. Avokati i Martinez, Patrick Baghdaserians, ka thënë se shqetësimi kryesor i klientit është “shëndeti, mirëqenia dhe siguria e fëmijës së mitur” dhe për këtë arsye ai iu drejtua gjykatës me kërkesë për një urdhër kufizues në një çështje që e ka paraqitur si dhunë në familje.
Halle Berry dhe Olivier Martinez paraqitën kërkesën për divorc në tetor 2015, rreth dy vjet pas martesës së tyre; pas një procesi që zgjati gati tetë vjet, divorci u finalizua në vitin 2023. Ish-çifti ra dakord për bashkëkujdesin ndaj djalit të tyre, Maceo. Berry është gjithashtu nënë e Nahla, 18 vjeç, të cilën e ka me ish-partnerin Gabriel Aubry.
