Barcelona reagoi pas komunikatës së UEFA-s që konfirmoi marrjen e dokumentacionit nga Real Madrid lidhur me çështjen Negreira. Në një njoftim për shtyp klubi katalanas thekson se nuk ka nisur asnjë hetim të ri ndaj tij nga qeveria e futbollit evropian. Sipas Barcelonës, procedimi ndaj klubit është i hapur që nga viti 2023 me caktimin e dy hetuesve dhe që atëherë janë ndërmarrë veprimet që janë konsideruar të përshtatshme, ndërsa klubi ka plotësuar gjithnjë kërkesat e bëra. Komunikata sqaron se procesi nuk është rihapur, pasi nuk ka qenë kurrë i mbyllur.
Klubi njofton se UEFA ka konfirmuar vetëm marrjen e dokumentacionit nga ana e Realit të Madridit dhe se dy hetuesit e përfshirë do ta vlerësojnë atë brenda kornizës së hetimeve ekzistuese. Barcelonës i referohet faktit që në njoftimin e UEFA-s bëhen dy përmendje: një hetim dhe një rishikim në zhvillim, çka sipas klubit do të thotë se nuk ka hapje, rihapje apo riaktivizim të ndonjë procedimi dhe se nuk ka asnjë prononcim lidhur me përmbajtjen ose vlerën e dokumentacionit të dorëzuar. Vendimet për veprimet e mëtejshme i takojnë hetuesve, të cilët do të vendosin çfarë veprimesh do të ndërmarrin lidhur me materialet e paraqitura.
Barcelonës i është komunikuar gjithashtu se aktualisht nuk kanë ardhur kërkesa të reja për informacion nga UEFA dhe se as klubi nuk është informuar mbi ndonjë denoncim zyrtar të Realit. Kur të ketë kërkesa të reja, klubi thotë se do t’u përgjigjet sipas mënyrës së përshtatshme siç ka vepruar deri tani.
Në njoftim Barcelona përkujton se çështja lidhet edhe me procedimin penal që po zhvillohet në Spanjë dhe se e gjithë situata do të vazhdojë të lidhet me përfundimin e atij procesi. Që nga fillimi i hetimit, FC Barcelona thotë se ka vazhduar të marrë licencën e UEFA-s pa vërejtje dhe të marrë pjesë në kompeticionet e saj. Klubi konfirmon gjithashtu bashkëpunimin me autoritetet kompetente dhe kërkon që raportimi për këtë çështje të bëhet me rigorozitet dhe saktësi. (Top Channel)
