Situata në rezervuarin e Kasharajt në Lushnjë vazhdon të jetë e rënduar disa ditë pasi ulja e ndjeshme e nivelit të ujit shkaktoi ngordhjen e një numri të madh peshqish. Si pasojë e tërheqjes së ujit, në hapësirat ku është zbrazur rezervuari kanë mbetur zona me baltë dhe llucë ku janë përqendruar trupat e gjallesave të ngordhura, sipas pamjeve nga terreni.
Ditën e sotme ka nisur një operacion dezinfektimi i zonës së prekur. Një dron i Ministrisë së Bujqësisë është ngritur mbi hapësirën ku janë grumbulluar peshqit e ngordhur dhe po kryen spërkatjen e vatrave të prekura, në kuadër të masave për trajtimin e zonave të kontaminuara. Ndërhyrja me dezinfektim synon trajtimin e vendeve ku janë përqendruar trupat e peshqve, ndërsa autoritetet vijojnë monitorimin e situatës.
Problematika u shfaq pas një uljeje të ndjeshme të nivelit të ujit në rezervuar. Bashkia e Lushnjës kishte planifikuar rikonstruksionin e portës dalëse të rezervuarit, dhe për të hapur rrugë punimeve uji është zbrazur nga rezervuari. Për shkak të kësaj ndërhyrjeje, pjesë të hapësirës u mbushën me baltë dhe llucë, ku më pas u grumbulluan gjallesat e ngordhura.
Reservuari i Kasharajt përdoret kryesisht për vaditjen e tokave bujqësore të Lushnjës. Ngjarja ka ringjallur shqetësime për pasojat që mund të kenë ndodhur mbi gjallesat dhe mjedisin përreth rezervuarit. Autoritetet kanë nisur masat e dezinfektimit dhe po e monitorojnë zhvillimin e situatës, ndërsa operacionet në terren vijojnë me përdorimin e mjeteve të përshtatshme për spërkatje dhe trajtim të pikave të prekura.
Pamjet dhe raportimet nga terreni tregojnë se problemi vazhdon të jetë i dukshëm në zonat ku uji është tërhequr, me koncentrim të peshqve të ngordhur në pjesët më të thata dhe me baltë të rezervuarit. Top Channel.
