Pas shpërndarjes në media, portale dhe rrjete sociale të materialeve intime të personave publikë në vend, Zyra e Komisionerit për të Drejtën e Informimit dhe Mbrojtjen e të Dhënave Personale, në krye me Besnik Dervishin, ka reaguar duke kërkuar që publikimi dhe rishpërndarja e këtyre përmbajtjeve të ndalet menjëherë. Komisioneri thekson se edhe personat publikë gëzojnë të drejtën për privatësi dhe se kurioziteti për jetën intime të një individi nuk mjafton për të justifikuar publikimin si çështje me interes publik.
Në reagim nënvizohet se Ligji nr. 124/2024 “Për mbrojtjen e të dhënave personale” ndalon përpunimin dhe shpërndarjen e materialeve intime, dhe se publikimi i mëparshëm i një materiali në internet nuk e bën të ligjshme ripublikimin ose rishpërndarjen e tij. Zyra paralajmëron se çdo përpunim i paligjshëm i të dhënave personale mund të sjellë masa administrative dhe penale dhe kërkon heqjen e përmbajtjeve të publikuara në kundërshtim me ligjin.
Komisioneri kujton se liria e shprehjes dhe e informimit duhet të ushtrohet në përputhje me nenin 43 të ligjit, duke respektuar kriteret e domosdoshmërisë, proporcionalitetit dhe mbrojtjes së thelbit të të drejtave themelore. Gjithashtu vihet në dukje se çdo rishpërndarje mund të rrisë ekspozimin dhe dëmin ndaj personave të prekur dhe familjeve të tyre.
Zyra bën thirrje të gjitha mediave, portaleve dhe përdoruesve të rrjeteve sociale të respektojnë jetën private dhe dinjitetin e individëve dhe të ndërpresin publikimin dhe rishpërndarjen e materialeve intime të publikuara në mënyrë të paligjshme, si dhe të heqin përmbajtjet që shkelin ligjin. Në përfundim, njoftohet se çdo person që përpunon të dhëna personale në mënyrë të paligjshme do të jetë subjekt i masave përgjegjëse administrative dhe penale. Përmbajtja e njoftimit është bërë publike nga Zyra e Komisionerit dhe ripublikuar nga Top Channel.
