Shkarkimi i menjëhershëm dhe i pakontrolluar i ujit të rezervuarit të Kasharajt shkaktoi një katastrofë ekologjike, me ngordhjen e tonelatave me peshq. Ngjarja la sasi të mëdha peshqish të vdekur në cekëtinë e rezervuarit, duke krijuar një situatë kritike mjedisore dhe ushqimore.
Në vend që ngjarja të shërbente si një këmbanë alarmi për të mbajtur larg qytetarët, ka ndodhur e kundërta: banorë dhe të pranishëm kanë sfiduar baltën dhe llumin për të mbledhur peshqit e mbetur në zonat e cekëta. Qëllimi i tyre ishte konsumimi i peshqve ose edhe shitja e tyre, pavarësisht rrezikut që sjell gjendja e tyre pas shkarkimit të papritur të ujit.
Ekspertët e sigurisë ushqimore e konsiderojnë të rrezikshëm konsumimin e këtij peshku. Sipas tyre, peshku që mbetet në ujë të mbetur, llum dhe baltë fillon procesin e kalbjes brenda pak minutash. Ndryshimet e temperaturave dhe ekspozimi ndaj ajrit rrisin me shpejtësi ngarkesën bakteriale në trupin e peshkut dhe në sipërfaqet përreth, duke përshpejtuar degradimin e materialit organik.
Në këto kushte, peshqit bëhen vatër për baktere të rrezikshme dhe toksina të tjera. Ekspertët paralajmërojnë se këto mikrobe dhe substanca toksike mund të shkaktojnë infeksione të rënda gastrointestinale te personat që konsumojnë peshkun e prekur. Rreziku i sëmundjeve lidhet me shpejtësinë e kontaminimit pas daljes së peshqve në sipërfaqe, veçanërisht kur ata ekspozohen ndaj temperaturave më të larta dhe ajrit, faktorë që favorizojnë shumimin bakterial.
Ngjarja paraqet një kombinim të dëmit ekologjik dhe rrezikut për shëndetin publik për shkak të praktikave të mbledhjes dhe konsumimit të peshqve nga zonat e prekura. Top Channel
