Një studente 21-vjeçare e Universitetit të Georgias ka mbetur e gjallë pas një rëndeje nga dritarja e një apartamenti në katin e tetë të një pallati në Athens, Georgia. Kristin Sargent, studente e vitit të fundit në degët financë dhe marketing, ndodhej në një apartament në kompleksin “The Rambler” të shtunën në mbrëmje, kur ra nga dritarja.
Sipas raportit të policisë, vajza po kërcente mbi një divan ose dyshek pranë një dritareje të hapur dhe në një moment ka kaluar përmes rrjetës mbrojtëse, duke rënë nga kati i tetë dhe përfunduar në zonën pranë pishinës. Oficeri Erik Ellison njoftoi se në vendngjarje u gjetën shenja që tregojnë se studentja mund të kishte goditur një stol metalik gjatë rënies; një pjesë e mbështetëses së stolit ishte thyer dhe në jastëk u vunë gjurmë gjaku. Dëshmitarët thanë gjithashtu se një shezlong mund të ketë zbutur pjesërisht rënien përpara se ajo të përplasej në tokë.
Babai i saj, Richard Sargent, tha se Kristin ndodhet në terapi intensive dhe ka pësuar disa fraktura, por gjendja e saj po përmirësohet. “Ajo po lufton fort dhe do të jetë mirë”, tha ai, dhe familja, pas telefonatës për aksidentin, udhëtoi menjëherë nga Virginia drejt Georgias.
Policia ka deklaruar se informacionet e mbledhura deri tani tregojnë se bëhet fjalë për një aksident, ndërsa hetimi vijon. Pas ngjarjes, administrata e kompleksit “The Rambler” i kujtoi banorëve se dritaret janë të pajisura me mekanizma sigurie dhe kërkoi që të mos i prekin, heqin apo çaktivizojnë. Autoritetet ende nuk kanë bërë të ditur nëse mekanizmi i sigurisë në dritaren nga ku ra studentja ishte aktiv në momentin e incidentit.
Në ndërkohë, miqtë dhe studentët e tjerë kanë lënë dhjetëra mesazhe urimi për Kristin, duke i uruar një shërim të shpejtë. Hetimi mbi shkaqet e rënies dhe rrethanat e sakta vazhdon, sipas zyrtarëve.
