Presidenti i Argjentinës, Javier Milei, ka kërcënuar se do të ndërmarrë veprime ligjore kundër Mbretërisë së Bashkuar nëse Londra nuk ndalon punimet për kërkimin dhe shfrytëzimin e naftës pranë Ishujve Falkland. Në një postim në rrjetet sociale, Milei i ka dhënë qeverisë britanike një afat prej dy javësh për të anuluar projektin e fushës së naftës “Sea Lion”, një bashkëpunim midis kompanive britanike dhe izraelite. Ai tha se, nëse afati nuk respektohet, ka udhëzuar Departamentin e Shtetit dhe ekipet ligjore të nisin procedurat ndërkombëtare të arbitrazhit kundër Mbretërisë së Bashkuar, duke akuzuar Londrën për “plaçkitje të paligjshme të burimeve tona përmes projektit Sea Lion”.
Milei paralajmëroi gjithashtu se në rast se çfarë ai e quajti “shfrytëzim i paligjshëm” nuk ndalet brenda dy javësh, Argjentina do ta çojë çështjen në Gjykatën Ndërkombëtare për Ligjin e Detit, me seli në Hamburg. Kompanitë e përfshira në projekt kanë deklaruar se disponojnë licenca të vlefshme të lëshuara nga autoritetet britanike, sipas BBC.
Fusha “Sea Lion”, rreth 200 kilometra nga Ishujt Falkland, vlerësohet të përmbajë rreth 1.7 miliardë fuçi naftë. Kompanitë Rockhopper Exploration nga Britania dhe Navitas Petroleum nga Izraeli pritet të nisin shpimet në këtë zonë brenda dy viteve. Deklaratat e Mileit vijnë në një kohë të tensioneve të shtuar mes Argjentinës dhe Britanisë për statusin dhe sovranitetin mbi Ishujt Falkland, më shumë se katër dekada pas luftës së vitit 1982, kur Britania zmbrapsi pushtimin argjentinas të arkipelagut.
Në fjalimin e tij para Asamblesë së Përgjithshme të OKB-së javën e kaluar, Milei kritikoi ashpër Kombet e Bashkuara, duke e cilësuar organizatën “të padobishme” dhe duke akuzuar disa prej zyrtarëve të saj se u shërbejnë “parazitëve arrogantë që maskohen si burokratë me qëllime të mira”. Në reagim ndaj kërcënimeve të tij, Sekretari Britanik i Mbrojtjes, Wes Streeting, tha se Argjentina “nuk ka kapacitetin” për të pushtuar ishujt me forcë. Në një referendum të vitit 2013, banorët e Ishujve Falkland votuan me 99.8% për të ruajtur statusin e tyre si territor britanik jashtë shtetit.
