Presidentja e Komisionit Evropian, Ursula von der Leyen, do të nisë nesër një turne ballkanik, me ndalesën e parë në Tiranë. Gjatë vizitës në kryeqytetin shqiptar, ajo do të zhvillojë takime me presidentin Bajram Begaj dhe kryeministrin Edi Rama.
Më 1 tetor, Von der Leyen do të vijojë me takime në Kosovë, ku është parashikuar të takohet me presidenten në detyrë Albulena Haxhiu dhe kryeministrin Albin Kurti. Në të njëjtën ditë, kreu i Komisionit Evropian do të vazhdojë vizitat e saj në Malin e Zi, ku do të takohet me presidentin Jakov Milatović dhe kryeministrin Milojko Spajić.
Turneu do të përmbyllet të premten në Maqedoninë e Veriut, ku Von der Leyen do të takohet me presidenten Gordana Siljanovska-Davkova dhe kryeministrin Hristijan Mickoski. Në itinerarin e vizitave për këtë raund nuk përfshihen Serbia dhe Bosnje-Hercegovina; sipas njoftimit zyrtar, këto dy vende janë lënë jashtë për shkak të zgjedhjeve të ardhshme që do të zhvillohen atje.
Përveç takimeve bilaterale, Presidentja e Komisionit Evropian sjell me vete një plan për një udhërrëfyes të posaçëm që synon të mbështesë rrugën drejt anëtarësimit në Bashkimin Evropian për Shqipërinë, Malin e Zi, Moldavinë dhe Ukrainën. Ky plan parashikon identifikimin e reformave prioritare, përcaktimin e afateve orientuese dhe vendosjen e objektivave konkrete për përfundimin e fazave të negociatave për anëtarësim.
Në kuadër të këtij udhërrëfyesi, përveç angazhimeve që priten nga vendet që synojnë anëtarësimin, edhe shtetet anëtare të BE-së parashikohen të marrin përgjegjësi për të avancuar procesin. Vendimet kyçe për zbatimin dhe progresin e këtij plani do të kërkojnë miratimin unanim të vendeve anëtare të Bashkimit Evropian.
