Sistemi financiar shqiptar ka shënuar përparim të ndjeshëm krahasuar me vlerësimin e viteve 2013–2014, sipas misionit të përbashkët të Fondit Monetar Ndërkombëtar dhe Bankës Botërore në kuadër të Programit të Vlerësimit të Sektorit Financiar (FSAP). Përmbyllja e vlerësimit u diskutua në një takim me Guvernatorin e Bankës së Shqipërisë, Gent Sejko, ku morën pjesë edhe drejtues të Autoritetit të Mbikëqyrjes Financiare, Agjencisë së Sigurimit të Depozitave dhe Ministrisë së Financave.
FSAP konstatoi se Shqipëria ka institucione financiare më të shëndetshme dhe një sistem financiar më të diversifikuar. Vlerësimi evidenton modernizimin e infrastrukturës së pagesave, zgjerimin e ndërmjetësimit financiar dhe përdorimin më të madh të teknologjisë në ofrimin e shërbimeve financiare. Në fokus ishin qëndrueshmëria e sistemit ndaj rreziqeve dhe goditjeve, kuadri rregullator dhe mbikëqyrës, administrimi i krizave financiare, rreziku sistemik, siguria kibernetike, financimi në epokën digjitale dhe zhvillimi i tregjeve të kapitalit.
FMN dhe Banka Botërore vlerësuan përafrimin e ndjeshëm të kuadrit ligjor dhe rregullativ shqiptar me standardet e Bashkimit Evropian, gjë që sipas tyre ka krijuar kushte për një mbikëqyrje më efektive të sektorit financiar. Njëkohësisht, rekomandimet e FSAP synojnë forcimin e mëtejshëm të qëndrueshmërisë së sistemit financiar, përmirësimin e administrimit të rreziqeve dhe rritjen e rolit të sektorit financiar në financimin e ekonomisë reale.
Guvernatori Gent Sejko falënderoi ekipin e ekspertëve të FMN-së dhe Bankës Botërore për punën dhe theksoi rëndësinë e një vlerësimi të pavarur në këtë fazë të zhvillimit të sistemit financiar shqiptar. Ai deklaroi se rekomandimet e FSAP do të analizohen nga autoritetet shqiptare dhe do të përdoren për të mbështetur reformat e mëtejshme në periudhën afatmesme.
Në përfundim, palët e vlerësuan procesin si të suksesshëm dhe shprehën angazhimin për vijimin e bashkëpunimit dhe ofrimin e asistencës teknike në disa prej fushave të përfshira në vlerësim.
