Në konferencën ndërparlamentare me përfaqësues të institucioneve shqiptare, Parlamentit Europian dhe parlamenteve të vendeve europiane, Kryeministri Edi Rama u ndal te perspektiva europiane e Shqipërisë dhe e vendeve të Ballkanit Perëndimor, duke theksuar se dëshira për anëtarësimin në BE mbetet një nga çështjet që bashkon politikën shqiptare.
Rama u bëri thirrje vendeve europiane që të mos e lënë përsëri pas dore rajonin, duke paralajmëruar se pasojat do të ishin më të mëdha se një dështim i thjeshtë politik. Ai krahasoi qëndrimin e vendeve të Ballkanit me atë të disa vendeve europiane, duke vënë në dukje se në vendet europiane BE-ja shpesh merret si e mirëqenë, ndërsa në vendet e Ballkanit Perëndimor ekziston një angazhim i vërtetë dhe një dëshirë e vazhdueshme për t’u integruar.
Në fjalimin e tij Rama tha: “Krahasuar me vendet europiane, ne kemi përparësi, sepse ende ne e dashurojmë BE-në. Nuk ndodh fiks kështu me vendet tuaja, ku më shumë merret si e mirëqenë BE-ja, sikur të ishte matesë.” Ai theksoi se kjo përkushtim reflektohet në debatet brenda vendit: është e vërtetë që ka mosmarrëveshje dhe diskutime të shumta, por pavarësisht tyre ekziston konsensusi mbi synimin për t’u bërë pjesë e Europës. “Ne debatojmë shumë gjëra këtu brenda, në vendin tonë. Çdo ditë e kemi kapacitetin për të gjetur arsye që të mos jemi dakord me njëri-tjetrin, ama për një gjë kemi rënë dakord, që duam të jemi pjesë e Europës,” u shpreh ai.
Duke u drejtuar partnerëve europianë, Rama shprehu shpresën që Evropa të mos “na lërë përsëri në baltë”, dhe paralajmëroi për pasojat e një refuzimi ose neglizhence: “Sepse në këtë kohë, po të lihemi ne në baltë, shkon përtej të lënit në baltë të një vendi, por është të lësh në baltë vetveten. Nëse Europa do të lërë në baltë Ballkanin perëndimor, nuk do jetë thjeshtë dështim, por do jetë dështimi më madhor.”
