Trajneri Roberto Mancini bëri apel për ruajtjen e qetësisë pas humbjes së Italisë ndaj Belgjikës në Olimpico në ndeshjen e parë të Nations League, duke theksuar se skuadra po përballet me kritika të shumta. Ndeshja e ardhshme me Turqinë është përshkruar si një lloj “playoffi”, dhe Mancini nënvizon nevojën për t’i dhënë kohë të rinjve. Në një intervistë për SkyTG24 ai tha: “Ne duhet të vazhdojmë të rrimë të qetë, pa nervozizmin që po shoh vërdallë. Futbolli përbëhet nga episode. Mbrëmjen e së premtes gjërat mund të kishin ndryshuar në pjesën e dytë, por Belgjika fitoi me meritë. Të rinjve iu duhet dhënë kohë, Romano më pëlqeu, bëri një ndeshje të mirë, përtej gabimit që mund ta bëjnë të gjithë.”
Mancini konfirmoi se mund të bëjë ndryshime në formacion për ndeshjen në Turqi, duke shpjeguar se në nivelet e sotme nuk është e qëndrueshme të luash katër ndeshje kaq pranë njëra-tjetrës. “Tani në Turqi, kemi mundësinë që të ndryshojmë diçka dhe mbase edhe ndonjë futbollist,” u shpreh ai, duke shtuar se Turqia e Montella ka një skuadër shumë të fortë dhe plot talente, prandaj do të jetë e vështirë.
Duke u përpjekur të largojë presionin nga kombëtarja, Mancini tha për RaiSport: “Presion pas humbjes me Belgjikën? Asnjë, është një ndeshje futbolli. Nesër do të kërkojmë të luajmë mirë dhe të fitojmë.” Ai kujtoi se edhe para Europianit të fituar nuk kishte shumë besim të jashtëm dhe theksoi se duhet punë dhe durim për të rinjtë, të cilëve klubet shpesh nuk ua japin kohën e nevojshme në ndeshje të këtij niveli.
Në një intervistë për Sportmediaset Mancini theksoi se ringritja e kombëtares nuk mund të ndodhë me dy stërvitje: “Kombëtarja Italiane nuk mund të rilindë me 2 stërvitje. E dinim që do të hasnim në vështirësi.” Ai shtoi se po vlerësojnë të gjithë futbollistët, veçanërisht të rinjtë, për të kuptuar nëse mund të qëndrojnë me skuadrën. Mancini përmendi gjithashtu se në Nations League kanë ende pesë ndeshje dhe “gjithçka mund të ndodhë.”
