Kryeministri Edi Rama komentoi zhvillimet lidhur me hetimin ndaj ish-drejtoreshës së SHISH, Vlora Hyseni, duke theksuar se çështja penale duhet të trajtohet vetëm nga drejtësia. Ai ngriti shqetësimin për ekspozimin publik të të dhënave të dosjes hetimore, duke argumentuar se kjo ka dëmtuar reputacionin e një institucioni të rëndësishëm të sigurisë kombëtare dhe ka shqetësuar partnerët ndërkombëtarë.
Rama theksoi se çdo akuzë, për këdo qoftë, duhet të provohet ose të rrëzohet përmes një procesi të pavarur, të paanshëm dhe të rregullt gjyqësor. Sipas tij, çdo masë kufizimi të lirisë nga organi i akuzës, për këdo që nuk ka imunitet parlamentar, kundërshtohet vetëm në gjykatë dhe jo në podiumin e kryeministrit ose në foltoret e politikës. Këto pika, tha ai, janë linja sjelljeje që vlejnë për të gjithë dhe për shumicën qeverisëse.
Megjithatë, Rama shtoi se respekti për pavarësinë e drejtësisë nuk do të thotë heshtje kur shfaqet një shqetësim parimor gjatë veprimtarisë së organeve të saj. Në këtë rast, përveç çështjes penale individuale, ekziston një fakt parimor dhe shtetëror që nuk mund të injorohet: gjatë marrjes së masës dhe administrimit gjyqësor të dosjes, një institucion me ndjeshmëri të veçantë për sigurinë dhe reputacionin e shtetit u ekspozua ndaj potencialit të një dëmi të madh, të cilin, sipas tij, duhej ta kishin parandaluar plotësisht.
Ai deklaroi se të dhëna të dosjes vërshuan nëpër kanale sociale dhe media para se gjykata të urdhëronte kufizim të publikimit, urdhër që nuk pati sukses. Kur hetimi arrin te kreu i shërbimit inteligjent të vendit, argumentoi Rama, çështja nuk është më e një pushteti të vetëm të pavarur, por e gjithë shtetit, dhe kjo qasje e lëshuar i ka lënë pa fjalë edhe partnerët ndërkombëtarë. Sipas tij, ndonëse nuk është e pazakontë që shefi i shërbimit sekret përballet me akuza, është hera e parë që institucioni i shërbimit sekret bëhet target i thashethemeve mediatike kombëtare dhe ndërkombëtare për shkak të mosmarrjes së masave që shtetet zakonisht marrin në raste të tilla.
