Gjatë mbledhjes së përgjithshme të 353 gjyqtarëve për zgjedhjen e tre anëtarëve të rinj të Këshillit të Lartë Gjyqësor (KLGJ), kryetari i Gjykatës së Lartë, Sokol Sadushi, pranoi ftesën e kryeministrit për një dialog mbi çështjen e pagave, duke theksuar nevojën për qartësi rreth tryezës së konsultimit. Sadushi vuri në dukje se vendimmarrja e Gjykatës Kushtetuese mbi pagat nuk mund të zëvendësohet nga një tryezë dialogu. Gjyqtari i Gjykatës së Apelit, Fatmir Ismalaj, përshkroi si “agresion të paprecedent” veprimin e bllokimit të pagave dhe miratimin e menjëhershëm të ndryshimeve ligjore, duke e cilësuar këtë si një goditje arrogante ndaj pavarësisë së gjyqësorit dhe rendit kushtetues në Shqipëri.
Sandër Simoni, gjyqtar i Gjykatës së Lartë, deklaroi se sfidat me pagat vazhdojnë dhe se gjyqtarët janë të vendosur të veprojnë së bashku për të mbrojtur dhe garantuar një pagë brenda kufijve kushtetues. Ai theksoi se, brenda ligjshmërisë, institucionet duhet të kenë mundësinë të ndërhyjnë për të përcaktuar pagën e magjistratit dhe pasojat e shfuqizimit të rregullimeve të mëparshme.
Përveç çështjes së pagave, kandidatët që garuan për KLGJ identifikuan si probleme kryesore edhe infrastrukturën dhe mungesën e eficencës së Këshillit. Gjithsej shtatë kandidatë ngritën shqetësime lidhur me funksionimin dhe rolin e KLGJ-së. Igerta Hysi nga Gjykata e Apelit të Posaçëm kërkoi që Këshilli të jetë personifikim i unitetit dhe mburojë e palëkundur e pavarësisë së gjyqësorit. Arbena Ahmetaj nga Gjykata e Lartë theksoi se kërkesa për gjykata dinjitoze, të sigurta dhe miqësore për palët dhe publikun nuk është luks, por nevojë kombëtare dhe emergjencë për kushtet aktuale të punës.
Brunilda Kadi nga Shkalla e Parë e Tiranës nënvizoi nevojën për përdorimin e teknologjisë dhe AI si mjet ndihmues për gjyqtarin dhe administratën, jo për të zëvendësuar gjykimin njerëzor, dhe propozoi që Këshilli të miratojë rregulla konkrete. Manjola Xhaxho denoncoi pabarazinë në ngarkesën e çështjeve për gjyqtarët, duke sjellë shembuj të dallimeve drastike, ndërsa Matilda Llangozi theksoi se një gjyqësor i fortë duhet të funksionojë në mënyrë të pavarur, por edhe me përgjegjësi të lartë ndaj ligjit dhe qytetarëve. Top Channel.
