Një shpërthim i fuqishëm ndodhi mëngjesin e sotëm në zonën e Plakës, në qendër të Athinës, pak para orës 08:00. Ngjarja u regjistrua në një ndërtesë dykatëshe në rrugën Lysikratous, përballë Shtyllave të Zeusit Olimpik. Si pasojë, ndërtesa e vjetër u shemb dhe copëzat e shpërndara plagosën lehtë një kalimtar.
Forcat zjarrfikëse ndërhynë gjithashtu në një ndërtesë pranë vendit të ngjarjes, nga e cila nxorën dy gra, njëra prej tyre e moshuar. Të dyja u transportuan nga ekipet e urgjencës EKAV në spitalin “Georgios Gennimatas”, ku morën ndihmën e parë. Shpërthimi u dëgjua në një pjesë të madhe të Athinës, ndërsa copëzat e ndërtesës dëmtuan disa automjete të parkuara dhe valët e goditjes shkaktuan dëme në disa biznese pranë zonës. Shërbimi zjarrfikës bëri të ditur se pas shpërthimit u shkaktua edhe një vatër e vogël zjarri.
Qendra Operacionale e Shërbimit Zjarrfikës u njoftua në orën 07:45. Në vendngjarje u dërguan 20 zjarrfikës, gjashtë automjete dhe një mjet special shpëtimi i njësisë së parë të EMΑK. Në operacion mori pjesë edhe Bashkia e Athinës, e cila dërgoi një mjet pune për të ndihmuar ekipet në terren. Për hetimin e shkaqeve të shpërthimit u angazhua edhe njësia hetimore për zjarrvëniet në Athinë.
Shkaqet e sakta të shpërthimit ende nuk janë përcaktuar. Sipas të dhënave paraprake, dyshohet se shpërthimi mund të ketë qenë pasojë e një rrjedhjeje të gazit natyror. Dëshmitarë në zonë kanë deklaruar se para shpërthimit ndienin një erë të fortë gazi. Një grua që punonte pranë vendit të ngjarjes raportoi se kishte parë tym dhe shembjen e ndërtesës, ndërsa një tjetër dëshmitare përshkroi shpërthimin si shumë të fuqishëm dhe tha se në momentin e ngjarjes kishte erë gazi dhe tym.
Autoritetet greke vijojnë hetimet për të përcaktuar shkakun e saktë të shpërthimit dhe për të vlerësuar të gjitha dëmet e shkaktuara.
