Kosova fitoi 1-0 ndaj Irlandës në ndeshjen e parë të edicionit të ri të Nations League, me Vedat Muriqin që rezultoi vendimtar. Dardanët kishin sinjalin e parë në minutën e 9, kur Vojvoda i shërbeu Muriqit, por gjuajtja e tij ishte e dobët. Në minutat në vazhdim skuadra e drejtuar nga Franco Foda ushtronte presion, ndërsa Kosova krijonte raste, por pa rrezikshmëri të madhe për portën irlandeze.
Në minutën e 22 Muriqi tentoi me kokë, por topi përfundoi mbi portë; menjëherë më pas Irlanda pati një përgjigje me Ogbene, por pa sukses. Kosova krijoi më pas shansin më të mirë deri në atë moment me një gjuajtje të Muriqit që u largua nga një mbrojtës irlandez në vijën fatale. Në minutën e 39 Muriqi u afrua sërish ndaj golit, por portieri Kelleher ndali përpjekjen e tij dhe pjesa e parë u mbyll 0-0.
Në fillim të pjesës së dytë Irlanda pati rastin e parë me Troy Parrot, të ndaluar nga portieri Muric. Rreth pesë minuta më vonë Kosova u përgjigj me Hoxhën, kur gjuajtja e tij kaloi pranë shtyllës. Dardanët dominuan fushën dhe vazhduan të krijonin raste, përfshirë atë të Edon Zhegrovës, të cilit i mungoi saktësia në hyrje të zonës.
Goli vendimtar erdhi gjashtë minuta para fundit të ndeshjes, kur kapiteni Vedat Muriqi shënoi nga një top i kthyer nga traversa pas gjuajtjes së Ermal Krasniqit. Sulmuesi dërgoi topin në rrjet dhe pas shënimit shfaqi një bluzë me mbishkrimin “Drejtësi për çlirimtarët”, ia dedikoi ish-krerëve të UÇK-së të dënuar në Hagë. Pas këtij goli Kosova pati mundësinë të dyfishojë me Krasniqin, por ai gaboi. Ndeshja u mbyll 1-0 në favor të Kosovës, e cila mori tre pikët e para në këtë edicion të Nations League.
