Oficerë nga Nëndrejtoria Kundër Krimit të Organizuar të Greqisë Veriore zbuluan rastin e një tentative vrasjeje me armë zjarri që ndodhi në janar 2025 në Selanik. Në orët e mëngjesit të së mërkurës u arrestuan tre shtetas shqiptarë, në kuadër të një operacioni të koordinuar nga Departamenti për Ndjekjen Penale të Krimeve kundër Jetës dhe Pronës dhe Departamenti i Inteligjencës dhe Veprimeve Speciale të Policisë greke: Robert Elezaj, 33 vjeç; Sergo Elezaj, 31 vjeç; dhe Rueldi Dragjoshi, 26 vjeç. Ata akuzohen për tentativë vrasjeje ndaj 32-vjeçarit Danjel Dushku, i cili gjithashtu është shpallur në kërkim.
Ngjarja ndodhi gjatë mbrëmjes midis 8 dhe 9 janarit 2025, kur tre të pandehurit iu afruan dhe sulmuan Dushkun në një zonë të Selanikut. Sipas policisë, 33-vjeçari Robert Elezaj qëlloi me pistoletë ndaj Dushkut pa e lënduar, por një person tjetër pranë Dushkut u plagos dhe u shkaktuan dëme në një dyqan. Po ashtu, 26-vjeçari Dragjoshi hapi zjarr ndaj Dushkut pa e lënduar atë. Për rolin e 31-vjeçarit Sergo Elezaj, policia njofton se ai i drejtoi një armë Dushkut, ndërsa nuk u mund të verifikohej nëse kishte qëlluar; ai ofroi ndihmë për bashkëpandehurit, duke i transportuar me një makinë me qira në vendin e ngjarjes dhe qëndroi aty me ta derisa u larguan.
Nga ana e tij, Dushku përdori armë zjarri duke qëlluar ndaj personave të arrestuar pa i lënduar ata, dhe shkaktoi dëme në makinën me të cilën mbërritën sulmuesit si dhe në një tjetër të parkuar. Gjatë operacionit të arrestimit, Sergo Elezaj tentoi të arratisej, nuk i bindej urdhrave të policisë, qëndroi në ballkon dhe më pas në çatinë e një shtëpie ngjitur, ku u lokalizua dhe u ndalua.
Në kontrollin e banesës së tij u sekuestruan një pistoletë me karikator, shtatë fishekë dhe dy karta identiteti të falsifikuara; rezultoi pa dokumente ligjore dhe me një dënim në pritje për armëmbajtje pa leje. Robert Elezaj po ashtu rezultonte në kërkim për një dënim në pritje lidhur me lehtësimin e transportit të shtetasve të vendeve të treta pa të drejtë hyrje dhe pa dokumente ligjore. Dragjoshi rezulton i dënuar më parë, me 15 muaj burg në Francë në 2021 për tregti heroinë dhe kokainë. Sipas policisë greke, tre të arrestuarit kanë precedentë të mëparshëm në Greqi për vjedhje, trafikim të paligjshëm të migrantëve, lëndime të rrezikshme trupore dhe shkelje të ligjeve për drogën dhe armët. Dushku, me precedentë penalë në Greqi dhe Shqipëri, rezulton vëllai i Fabio Dushkut, i dënuar në Greqi për vrasje dhe vepra të tjera penale.
