Pak ditë më parë avokati Alban Duraj, i ftuar në emisionin “Breaking me Fiori Dardha”, deklaroi se rasti i Bleona Matës ishte zgjidhur dhe se ajo ishte e birësuar nga një çift grek, duke thënë se këto informacione i kishte marrë nga një komunikim me nënën e Bleonës, zonjën Bukurie. Këto deklarata u kundërshtuan menjëherë nga avokati i familjes, Idajet Beqiri, i cili për emisionin “Shqipëria Live” i quajti të papërgjegjshme dhe theksoi se Duraj nuk ka asnjë lidhje me çështjen.
Sot u zhvillua përballja direkte mes Durajt dhe zonjës Bukurie në lidhje të drejtpërdrejtë me emisionin “Ftesë në 5” me Bieta Sulon. Nëna e Bleonës shprehu tronditje dhe mohoi çdo komunikim me Durajn, duke thënë se nuk ka pasur asnjë telefonatë apo kontakt dhe se është ndjerë e lënduar dhe e helmuar nga deklaratat që i janë atribuar. Ajo kërkoi që avokatët të bëjnë “punë të palodhur, të pastër dhe të vërtetë” dhe u shpreh se nuk e njeh Durajn, duke paralajmëruar se do të ndjekë penalisht nëse është kryer komunikim përmes personave të tjerë.
Avokati Duraj nga ana e tij tha se kishte cituar fjalët e zonjës Bukurie dhe se kishte regjistrim të bisedës. Ai sqaroi se ishte i ftuar si ekspert në një emision në RTSH dhe se nuk ishte prezantuar asnjëherë si avokati i familjes, duke shtuar se kur është prezantuar gabimisht si i tillë, ai e ka korrigjuar. Duraj tha se kishte diskutuar gjatë dhe pas emisionit, se i kishte dërguar linkun koordinatores së emisionit dhe se zonja Bukurie e kishte falënderuar për ndihmën që ofroi, ndërsa mohoi synimin e protagonizmit apo përfitimit personal.
Pavarësisht pretendimeve të Durajt, zonja Bukurie përsëriti se nuk e njeh dhe se nuk ka komunikuar me të, duke i kërkuar të pranojë dhe të pastrojë ndërgjegjen. Në reagimin e fundit të tij, Duraj deklaroi se nuk dëshiron debat, mohoi se po kërkon klikime dhe sqaroi se qëllimi i tij ka qenë ofrimi i mbështetjes financiare dhe kontributit, jo përfitimi personal.
