Një 44-vjeçar është sjellë para gjykatës së Leçes, i akuzuar se ka shtirë rolin e gjinekologut dhe i ka kërkuar dhjetëra grave foto e video intime. Ngjarjet, sipas hetimeve, kanë ndodhur midis korrikut dhe tetorit 2021 dhe përfshijnë 18 gra, të moshave nga 20 deri në 40 vjeç, shumica me banim në Leçe.
I dyshuari rëndohet me akuza për tentativë dhune seksuale, marrje të paligjshme të të dhënave personale dhe uzurpim të funksioneve publike. Rasti u ndez pas denoncimit të një studenteje 24-vjeçare nga Leçe. Hetuesit kanë rindërtuar se i akuzuari kishte siguruar të dhëna shëndetësore të grave dhe më pas i kontaktonte në telefon, duke u paraqitur si gjinekolog i strukturës spitalore ku ato kishin kryer më parë analiza dhe ekzaminime.
Sipas prokurorisë, ai u komunikonte pacienteve diagnoza të rreme dhe kërkonte që ato të dërgonin fotografi të pjesëve intime, nën pretendimin se këto ishin të nevojshme për ekzaminime të mëtejshme. Në disa raste i kishte sugjeruar grave edhe një “terapi” që përfshinte akte autoerotike para kamerave të kompjuterit, si dhe u kishte kërkuar informacione të hollësishme mbi jetën e tyre seksuale.
Hetimet kanë identifikuar 18 gra të përfshira konkretisht, ndërsa burime italiane raportojnë se i akuzuari kishte arritur të sigurojë dhjetëra materiale intime. Aktualisht 44-vjeçari ndodhet në paraburgim dhe do të mbahet përgjegjës përpara gjykatës për ngjarjet e vitit 2021.
Gjithashtu bëhet e ditur se i pandehuri kishte pasur më parë probleme me drejtësinë për fakte të ngjashme: në vitin 2012 ai u arrestua pas një hetimi të Policisë Postare dhe më vonë u dënua nga Gjykata e Bolonjës. Procesi gjyqësor për akuzat lidhur me ngjarjet e vitit 2021 do të zhvillohet nga gjykata kompetente.
