Mbi 34.9% e tregut të ndërmjetësve të pasurive të paluajtshme në Shqipëri është e paformalizuar. Ky sektor, jo pa peshë në ekonomi, kryen transaksionet ndërmjet qytetarëve dhe institucioneve si bankat, Kadastra, Tatimet dhe institucione të tjera, dhe moslicensimi i një pjese të ndërmjetësve krijon hapësirë për pastrim parash apo financime të dyshimta.
Për herë të parë është realizuar një studim mbi tregun e ndërmjetësve të pasurive, në të cilin vetë profesionistët raportuan se 34.9% e agjentëve që operojnë në treg veprojnë plotësisht informalë. Rezultatet theksojnë një boshllëk në përputhshmërinë me rregullat dhe praktikat formale të sektorit, duke rritur shqetësimet lidhur me transparencën dhe kontrollin e transaksioneve.
Edhe pse ekziston një ligj i miratuar që ka vendosur standarde për aktivitetin e ndërmjetësve të pasurive të paluajtshme, ai nuk zbatohet në praktikë, sipas të dhënave të studimit. Moszbatimi i legjislacionit reflekton vështirësi në regjistrimin, licensimin dhe mbikëqyrjen e agjentëve, gjë që, sipas raportimit, kontribuon në përhapjen e informalitetit në treg.
Në këtë kontekst Elona Hoxha theksoi se transparenca dhe siguria mbeten thelbësore në tregun e pasurive të paluajtshme, duke nënvizuar nevojën për përmirësim të zbatimit të rregullave dhe përforcim të kapaciteteve mbikëqyrëse.
Studimi dhe konstatimet e tij evidentojnë përqindjen e lartë të informalitetit midis ndërmjetësve dhe lidhjen e saj me riskun për aktivitete financiare të dyshimta, ndërsa nënvizojnë hendekun midis legjislacionit ekzistues dhe zbatimit praktik në treg.
Top Channel
