Japonia është në alarm për shkak të tajfunit të fuqishëm Dujuan, i cili po afrohet drejt bregdetit lindor. Autoritetet kanë aktivizuar alarme emergjence në Tokio dhe zonat përreth dhe i kanë nxitur banorët të ndjekin udhëzimet për evakuim. Më konkretisht, është ngritur alarmi i Nivelit 5, më i larti në sistemin japonez të paralajmërimeve, për qytetin Oshima dhe ishujt Izu në jug të prefekturës së Tokios; ky alarim prek rreth 1,900 familje dhe mbi 3,000 banorë. Në lagjen Meguro të Tokios është vendosur alarmi i Nivelit 4 për rrezikun e përmbytjeve dhe rrëshqitjeve të dheut, ndërsa në qendër të kryeqytetit është në fuqi alarmi i Nivelit 3.
Moti i keq ka shkaktuar ndërprerje të mëdha në transport. Rreth 500 fluturime në aeroportet Haneda dhe Narita janë anuluar, ndërsa disa shërbime të trenave me shpejtësi të lartë në linjën Tokaido janë pezulluar. Për shkak të kushteve atmosferike janë anuluar edhe aktivitete publike: koncertet e planifikuara për të hënën në festivalin muzikor Rock in Japan janë të anulluara, ndërsa është pezulluar programi i së hënës i Tokyo Game Show.
Agjencia Meteorologjike e Japonisë paralajmëron për reshje shumë të dendura që mund të arrijnë nivele rekord deri të martën, veçanërisht në zonat bregdetare. Paralajmërimet synojnë të parandalojnë pasoja nga përmbytjet dhe rrëshqitjet e dheut që rrezikojnë zonat e prekura. Autoritetet lokale dhe qendrore kanë aktivizuar masat e emergjencës dhe komunikatat drejt publikut, ndërsa kryeministrja Sanae Takaichi u ka bërë thirrje qytetarëve të marrin seriozisht paralajmërimet dhe udhëzimet për evakuim.
Situata mbetet e monitoruar nga shërbimet meteorologjike dhe agjencitë e emergjencës, ndërsa efektet e tajfunit pritet të ndikojnë në infrastrukturë dhe jetën publike në pjesë të ndryshme të tokës dhe bregdetit lindor të Japonisë.
