Konflikti disavjeçar mes Jemenit dhe Arabisë Saudite është përshkallëzuar pasi rebelët Huthi njoftuan se kanë lëshuar “një numër të madh raketash balistike, raketash lundrimi dronësh reaktivë” drejt “zonave tejet të ndjeshme” të mbretërisë saudite. Sipas zëdhënësit ushtarak të Huthëve, goditjet u përqendruan në kryeqytetin Riad dhe në qytetin bregdetar të Yanbu-së, ku ndodhen objektet kryesore të kompanisë shtetërore Aramco.
Huthët deklaruan se operacioni erdhi si një “përgjigje ndaj krimeve dhe 300 sulmeve ajrore” që forcat saudite kryen gjatë javës së kaluar mbi kryeqytetin e Jemenit, Sanaa. Pas goditjeve, nga rezervuarët e karburantit pranë aeroportit ndërkombëtar të Riadit u ngritën shtëllunga të dendura tymi të zi, dhe nivelet e sigurisë u rritën në maksimum. Për herë të parë pas muajsh qetësie, në Riad u aktivizuan sirenat e alarmit të mbrojtjes ajrore dhe qytetarëve iu kërkua zyrtarisht të qëndronin në shtëpi.
Autoritetet zyrtare saudite, deri më tani, kanë zgjedhur të heshtin dhe nuk kanë bërë asnjë koment mbi shkallën e dëmeve apo efikasitetin e sistemeve të tyre të mbrojtjes, të njohura si “Patriot”. Paralelisht me sulmet raketore dhe dronët, në terren vazhduan luftime të ashpra mes rebelëve dhe forcave qeveritare të mbështetura nga Arabia Saudite. Autoritetet raportuan të paktën 48 të vrarë brenda 24 orëve nga përleshjet që ndodhën këtë të shtunë.
Kjo valë e re dhune ka rënduar më tej krizën humanitare në vend, sipas raportimeve. Ngjarjet e fundit shënojnë një përshkallëzim të menjëhershëm të përplasjes që vazhdon prej vitesh midis palëve, duke prekur infrastrukturën civile dhe duke shkaktuar shqetësim për sigurinë publike në zonat e prekura. Burimi i materialit: Top Channel.
