Tre persona kanë humbur jetën dhe tetë të tjerë janë plagosur pas të shtënave me armë në Shkollën e Mesme Kombëtare Banga në komunën Banga, provinca Mindanao, në jug të Filipineve. Ngjarja ndodhi të premten pasdite; sipas autoriteteve mes viktimave janë dy nxënës 14-vjeçarë. Personi i dyshuar për sulmin, 16 vjeç, vrau veten pas të shtënave.
Kryebashkiaku lokal, Albert Palencia, tha se katër prej të plagosurve ndodhen në gjendje kritike. Ai raportoi se personi i armatosur hapi zjarr ndaj nxënësve pas pushimit të drekës, duke goditur gjithsej 10 persona përpara se të vriste veten. Palencia i tha Reuters se gjatë një bisedë në kohën e drekës, 16-vjeçari i kishte thënë miqve të tij të shkonin në shtëpi, duke u paralajmëruar se pas drekës do të zbatonte planin e tij; miqtë nuk e morën seriozisht paralajmërimin pasi e njihnin të riun si dikë që bënte shpesh shaka.
Autoritetet lokale po hetojnë motivin dhe rrethanat e plota të sulmit. Departamenti i Arsimit i Filipineve e cilësoi incidentin si “thellësisht të shqetësueshëm” dhe deklaroi se prioritet kryesor është siguria dhe mirëqenia e nxënësve, mësuesve dhe personelit të shkollës. Autoritetet u bënë thirrje qytetarëve të qëndrojnë të qetë dhe të mos shpërndajnë informacione të paverifikuara ndërsa vijon hetimi.
Pas ngjarjes, mësimi është pezulluar në të gjitha nivelet në të gjithë komunën e Bangës. Kryqi i Kuq i Filipineve njoftoi se ishte vënë në dijeni për të shtënat rreth orës 14:00, sipas kohës lokale, dhe një ambulancë me katër ndihmës mjekësorë u dërgua në vendngjarje për të ardhur në ndihmë të plagosurve.
