Në vend të ashensorit, studiuesit sugjerojnë të përdoren shkallët, pasi ngjitja e tyre çdo ditë ndihmon shëndetin e zemrës dhe ul rrezikun e vdekjes nga sëmundjet kardiovaskulare, ishemitë dhe hemorragjitë cerebrale. Një studim i bërë nga studiues anglezë analizoi të dhëna të 480 mijë personave, të moshave 35–80 vjeç, përfshirë të shëndetshëm dhe me probleme kardiake, dhe zbuloi se ata që ngjiteshin rregullisht me shkallë kishin 39% më pak rrezik të vdisnin nga sëmundjet e zemrës dhe 24% më pak rrezik të vdisnin nga çdo shkak tjetër, krahasuar me personat që e përdornin më rrallë këtë mënyrë aktiviteti. Ngjitja e shkallëve lidhet gjithashtu me uljen e kolesterolit në gjak dhe me një rrezik më të ulët për infarkt dhe goditje në tru.
Në vendin tonë, sëmundjet e zemrës përbëjnë një problem të rëndësishëm të shëndetit publik: rreth 53% të vdekjeve gjatë vitit 2025 i atribuohen sëmundjeve që kanë të bëjnë me enët e gjakut dhe çështje kardiovaskulare. Faktorët kryesorë që kontribuojnë janë presioni i lartë i gjakut, kolesteroli dhe mbipesha, të cilët ndikojnë në dëmtimin apo bllokimin e enëve të gjakut. Statistikat tregojnë se 41% e personave në grupmoshën 30–79 vjeç vuajnë nga tensioni i lartë i gjakut. Për më tepër, zakonet tona ushqimore mesdhetare, me prirje drejt konsumit të mishit dhe yndyrnave, kontribuojnë në raste të kolesterolit të lartë.
Mjekët kardiologë rekomandojnë rritjen e aktivitetit fizik si një masë parandalimi dhe përmirësimi të shëndetit kardiovaskular. Ngjitja e shkallëve përmendet si një formë e thjeshtë dhe e përditshme e ushtrimit që mund të ndikojë pozitivisht në parametrat e shëndetit të zemrës dhe të trurit. Mesazhi i studiuesve dhe rekomandimi mjekësor është që të hipni dhe të zbrisni shkallët çdo ditë nëse dëshironi të përmirësoni shëndetin e zemrës dhe trurit. Top Channel
