Deputetja e Partisë Demokratike Jorida Tabaku e konsideroi si një ditë të trishtueshme për shqiptarët vendimin e Gjykatës Speciale në Hagë, që dënoi katër ish-krerë të Ushtrisë Çlirimtare të Kosovës me një total prej 81 vitesh burgim. Në emisionin “Top Story”, ajo komentoi vendimin, rolin e Shqipërisë dhe Kosovës pas këtij zhvillimi, si dhe nevojën për një qasje institucionale të përbashkët.
Tabaku theksoi se tre komandantët shkuan në luftë pa siguri për kthimin e tyre dhe se edhe ndërtimi i gjykatës u bë pa dijeni për këtë dënim, duke e konsideruar krijimin e saj si një akt burri shteti. Ajo ngriti dyshime mbi ndihmat financiare të Shqipërisë për procesin gjyqësor, duke deklaruar se nuk dihet nëse vendi ka akorduar fonde, ndërsa sipas saj Kosova ka dhënë 40 milionë euro.
Deputetja vuri në dukje se Shqipëria nuk ka shpallur me zë gjenocidin në ato zona dhe se vizitat në Hagë nuk janë shprehje e patriotizmit. Sipas saj, nuk ka pasur veprime konkrete nga ana e Shqipërisë përveç fjalimit të kryeministrit Edi Rama në asamblenë parlamentare të Këshillit të Europës; opozita, tha ajo, ka pasur iniciativën për të shpallur gjenocidin. Tabaku akuzoi Serbinë se punon vazhdimisht kundër shqiptarëve dhe sugjeroi se kërkesa për dhomat u bë me detyrim, çka i ka bërë njerëzit më të rezervuar për të folur.
Ajo kritikoi mungesën e angazhimit parlamentar gjatë katër viteve të fundit, duke thënë se parlamenti duhej t’i kishte trajtuar një nga një masakrat dhe t’i kishte shpallur si akte gjenocidi. Tabaku përmendi se fjalimi i Ramës në Këshillin e Europës ishte i fortë dhe retorik, por që disa e kundërshtuan.
Si përfundim, Tabaku kërkoi bashkim të dy parlamenteve për qëllime të përbashkëta dhe iniciativë të dy qeverive, duke hequr egot e kryeministrave. Ajo propozoi që të punohet me një strategji në apel deri në shkallën finale të gjykatave.
