Kryetari i Partisë Demokratike të Kosovës, Bedri Hamza, njoftoi se do të zhvillojë konsultime me liderët e partive politike për të diskutuar mundësinë e një iniciative ligjore në Kuvend lidhur me Gjykatën Speciale. Në konferencën për media pas mbledhjes së Kryesisë së PDK-së, ai tha se çështja e Gjykatës dhe aktgjykimeve ndaj ish-drejtuesve të UÇK-së nuk duhet trajtuar si problem i një force të vetme politike dhe synon krijimin e një qëndrimi të përbashkët mes subjekteve politike.
Hamza njoftoi se do të bëjë përpjekje për komunikim për shkak të seriozitetit të situatës, duke theksuar se kjo mund t’i shërbejë Serbisë si shtet agresor për dëmtimin e Kosovës në të ardhmen. PDK, sipas tij, do të propozojë veprime konkrete ligjore dhe demokratike, me kërkesën që çdo reagim të zhvillohet brenda institucioneve dhe rregullave demokratike. Ai nënvizoi të drejtën e qytetarëve për të protestuar, por bëri thirrje që gjithçka të jetë brenda rregullave demokratike, e kujdesshme dhe pa dëmtime për institucione apo individë.
Kreu i PDK-së foli edhe për mundësinë e thirrjes së një seance të jashtëzakonshme të Kuvendit, duke bërë të ditur se partia ka siguruar 22 nënshkrime, të nevojshme për një kërkesë të tillë. Vendimi për procedimin e seancës do të varet nga zhvillimet dhe nevojat që krijohen.
Lidhur me ide të ndryshimit apo zhbërjes së Gjykatës Speciale, Hamza sqaroi se PDK nuk paraqet çështjen në këto terma, por kërkon përshtatje me një situatë të re. Ai theksoi se partia nuk synon të pengojë punën e Gjykatës dhe vlerësoi si të rëndësishme që ajo të përmbushë detyrimin për të hetuar dhe verifikuar gjetjet e raportit të Dick Martyt, për të cilin u krijua.
Hamza përfundoi duke thënë se hapat e mëtejshëm do të diskutohen me subjektet e tjera politike, me synimin e arritjes së një konsensusi sa më të gjerë institucional.
