Kryeministri i Kanadasë, Mark Carney, deklaroi para Parlamentit Evropian se një aleancë më e ngushtë mes Kanadasë dhe Bashkimit Evropian do të shërbejë si një shembull frymëzues për demokracitë e tjera në botë. Ai theksoi se përballë sfidave aktuale dhe përçarjeve gjeopolitike, vendet duhet të gjejnë dimensione të reja bashkëpunimi dhe vuri në pah rëndësinë e zgjerimit të lidhjeve njerëzore. Si shembull, Carney përmendi mundësinë që të rinjtë të studiojnë, jetojnë dhe punojnë lirshëm në të dyja anët e Atlantikut.
Deklarata erdhi pas një propozimi të krerëve të BE-së, të cilët shprehën vullnetin për të krijuar një hapësirë që lejon Kanadanë të zhvillojë marrëdhënie më të ngushta partneriteti me bllokun evropian. Carney mirëpriti këtë qasje, ndërsa theksoi se vëmendja e Kanadasë është orientuar drejt diversifikimit të tregtisë dhe krijimit të aleancave të reja strategjike.
Nisma po zhvillohet në një kohë tensionesh tregtare dhe tarifash të vendosura nga administrata e Shteteve të Bashkuara dhe Presidenti Donald Trump, të cilët kanë paralajmëruar kundërpërgjigje nëse planet për integrim më të ngushtë mes Kanadasë dhe Evropës ecin përpara. Plani për bashkëpunim më të thellë parashikohet të diskutohet më gjerësisht në samitin që do të mbahet në Montreal në fund të muajit tetor, ku pritet të përcaktohen detajet konkrete dhe hapat e mëtejshëm.
Fjalimi i Carney-it në Bruksel u shoqërua me një ndërprerje të papritur, kur nga salla u dëgjua një thirrje ironike me sloganin “SHBA, SHBA!”, e cila shkaktoi reagime pakënaqësie nga pjesa tjetër e të pranishmëve. Pas ndërprerjes, kryeministri vazhdoi fjalimin, duke u përqendruar tek forcimi i pozicionit ndërkombëtar të Kanadasë dhe zgjerimi i bashkëpunimit me partnerë evropianë.
