Ish-kryeministri shqiptar i Luftës së Kosovës, Pandeli Majko, e përshkroi si “një vendim dramatik që nuk e ndryshon historinë” verdiktin e Gjykatës së Hagës, duke shprehur shqetësim për ndikimin që mund të ketë në perceptimin historik të luftës së Kosovës. Pa i fshehur emocionet, ai tha se vendimi është “një dramë të jashtëzakonshme njerëzore” dhe shprehu pesimizëm për përpjekjet që, sipas tij, tentojnë të deformojnë historinë: “Dëshiroj të them që, megjithëse dëgjoj se UÇK-ja doli e pastër, kam një ndjenjë pesimizmi. Është disa herë që përpiqen të na deformojnë historinë. Nuk mund të thuash doli nga kjo histori e pastër UÇK-ja, që doli e papërlyer. Është fakt historik që UÇK-së ose i janë vrarë, ose i janë dënuar. Kjo është dramë dhe duhet vlerësuar thellësia e saj.”
Majko u shpreh se Kosova dhe Shqipëria duhet të tregojnë një qëndrim dinjitoz dhe të shmangin përplasjet me drejtësinë, duke vënë në dukje reagimet emocionale pas vendimit: “Sot kanë parë të gjithë njerëz duke qarë, fëmijë dhe ish-ushtarë të UÇK-së. Drama nga pikëpamja njerëzore është e jashtëzakonshme. Nuk ka nevojë të qajnë, por të kenë një qëndrim dinjitoz. Nuk është i fuqishëm ai që shan një vendim gjykate. Çdo inat karshi saj më duket dobësi.” Ai paralajmëroi se beteja juridike nuk ka përfunduar për shkak të procesit të Apelit dhe kërkoi që vendimi të shihet “jo si akt personal, por si akt që na ka goditur të gjithëve.”
Majko rikujtoi se Gjykata Speciale u krijua në vitin 2015 me vendim të Kuvendit të Kosovës, pas ndryshimeve kushtetuese dhe marrëveshjeve me Bashkimin Evropian, dhe e paraqiti pranimin e saj si “një çmim që Kosova zgjodhi të paguante në rrugën e saj drejt konsolidimit ndërkombëtar.” Ai vlerësoi se akti i krijimit kërkoi “një trimëri të caktuar” dhe se subkoshienca e shqiptarit e di se “gjithçka është paguar ose me vrasje, ose me burgosje.”
Vendimi ka edhe një dimension personal për Majkon: në vitet e luftës ai ishte kryeministër i Shqipërisë, ndërsa Hashim Thaçi ishte një prej drejtuesve të UÇK-së dhe pjesë e delegacionit të Kosovës në Rambujë. Për Thaçin, Majko tha: “Hashim Thaçi është drejtues i delegacionit të Rambujesë… Jam krenar që e kam pasur dhe do ta kem mik. Madje tani do ta kem mik më shumë.”
