Ish-kryeministri shqiptar i Luftës së Kosovës, Pandeli Majko, e përshkroi si “një vendim dramatik që nuk e ndryshon historinë” verdiktin e Gjykatës së Hagës. Pa e fshehur emocionin, ai tha se vendimi përbën një dramë të jashtëzakonshme njerëzore dhe shprehu shqetësim për mënyrën se si mund të ndikojë në perceptimin historik të luftës së Kosovës. Majko shprehu një ndjenjë pesimizmi pavarësisht lajmit se UÇK-ja doli e pastër, duke theksuar se nuk mund të thuhet se UÇK-ja doli e papërlyer, sepse si fakt historik shumicës së anëtarëve të saj u janë vrarë ose dënuar. Ai kërkoi që të vlerësohet thellësia e kësaj drame.
Majko theksoi se në këtë moment Kosova dhe Shqipëria duhet të tregojnë një qëndrim dinjitoz dhe të shmangin përplasjet me drejtësinë. Ai vuri në dukje reagimet emocionale që panë pas vendimit, me njerëz duke qarë, fëmijë dhe ish-ushtarë të UÇK-së, por u shpreh se nuk ka nevojë për ofendime ndaj gjykatës: “Nuk është i fuqishëm ai që shan një vendim gjykate. Çdo inat karshi saj më duket dobësi.” Majko paralajmëroi se beteja juridike nuk ka përfunduar, duke kujtuar se tani ka edhe procesin e Apelit dhe se vendimi duhet parë përtej fatit individual të të dënuarve, si një akt që ka goditur të gjithë dhe që në luftë është e vështirë të ndash aktin personal nga ai kolektiv.
Ai rikujtoi se Gjykata Speciale u krijua në vitin 2015 me vendim të Kuvendit të Kosovës, pas ndryshimeve kushtetuese dhe marrëveshjeve me Bashkimin Evropian, dhe e interpretoi pranimin e saj si një “çmim” që Kosova zgjodhi të paguante në rrugën e saj drejt konsolidimit ndërkombëtar. Majko tha se mënyra e formimit të kësaj gjykate kërkoi një trimëri të caktuar dhe se nga perspektiva ndërkombëtare apo historike nuk mund të akuzohet; sipas tij, subkoshienca e shqiptarit e di se gjithçka është paguar me vrasje ose me burgosje.
Vendimi ka edhe një dimension personal për Majkon: gjatë viteve të luftës ai ishte kryeministër i Shqipërisë kur Hashim Thaçi ishte një prej drejtuesve të UÇK-së dhe pjesë e delegacionit të Kosovës në Rambuje. Majko e përshkroi Thaçin si luftëtar dhe drejtues, shprehu krenari që e ka pasur dhe do ta ketë mik, madje “më shumë” pas këtij vendimi.
