Italia po përgatitet për rikthimin e Roberto Mancinit në pankinë, trajnerin nën drejtimin e të cilit kombëtarja u shpall kampione e Evropës në 2021, duke mundur Anglinë në finalen e Wembley. Rikthimi i Mancinit ka sjellë reagime pozitive brenda grupit, ku një ndër më entuziastët është portieri Gianluigi Donnarumma.
Në një intervistë për Sky Sport, Donnarumma tha se skuadra ka nevojë për shumë pozitivitet pas verës së vështirë të kaluar, kryesisht për shkak të moskualifikimit për në Botërorin 2026. Ai përmendi se përjetoi ditë të komplikuara dhe se ishte e rëndë të shihje turneun nga jashtë, por theksoi se tani duhet të ndërrohet faqe, të rikthehet optimizmi dhe të rindërtohet një grup i bashkuar.
Donnarumma identifikoi edhe rrugët që skuadra duhet të ndjekë për të arritur objektivat: bashkëpunim brenda ekipit dhe mbështetja e tifozëve italianë, që sipas tij është e nevojshme. Ai nënvizoi domosdoshmërinë për të ngritur kokën, për t’u rikthyer tek vlera e fanellës dhe për të fituar entuziazëm e motivim për ndeshjet e ardhshme dhe kualifikueset. Sipas tij, synimi është të rishkruhet historia e kombëtares dhe të kualifikohet përsëri për Kampionatin Evropian dhe Botërorin.
Duke folur për Evropianin e ardhshëm, Donnarumma përmendi se ai i 2028 do të zhvillohet në Mbretërinë e Bashkuar dhe finalja do të luhet në Wembley. Ai lidhi Wembley-n me një prej momenteve më të bukura personale, duke përmendur edhe lindjen e djalit të tij si një kujtim të veçantë. Portieri kujtoi me emocion përqafimin mes trajnerit Mancini dhe Gianluca Viallit pas fitores së 2021, një imazh që do ta mbajë gjithmonë me vete. Donnarumma shprehu besimin se, nën drejtimin e Mancinit, Italia mund të kthehet në nivelet që meriton dhe të kualifikohet përsëri në kompeticionet më të mëdha.
